''Qalatasaray'' derbiyə təyin olunan hakimdən narazıdı
Türkiyə futbol ictimaiyyəti həftəsonunu səbirsizliklə gözləyir.
Şənbə günü əzəli rəqiblərin duelində ''Fənərbaxça'' ''Qalatasaray''ı qəbul edəcək. Artıq hakim bəllidi. Bu prinsipial qarşılaşmanı Atilla Karaoğlan idarə edəcək. Amma ''Qalatasaray'' cəbhəsi bu təyinatdan narazıdı. Başqan Dursun Özbəki dinləyək:
''Ötən mövsüm xatırlayırsızsa, bu hakimlə bağlı sərt ifadələr işlətmişdim. ''Trabzonspor''a qarşı ev oyunumuzda bizi necə qətlə yetirdiyini, doğradığını dilə gətirmişdim. Bu dəfə mövsümün bəlkə də ən vacib oyununa yenə bu hakimi təyin ediblər. Belə çıxır ki, federasiyada sadəcə rəhbərlik dəyişib. Başqa heçnə dəyişməyib. Ölkədə başqa hakim yoxdumu? Mən ümumiyətlə hakimlər haqda nadir hallarda danışıram. İş elə gətirdi ki, ötən mövsüm məhz bu hakimin idarəçiliyini tənqid etdim. İndi də sanki bizim acığımıza onu derbiyə təyin ediblər. TFF bu cür məsələlərə diqqət yetirməsə, vəziyyət getdikcə gərginləşəcək''.
Maraqlıdı ki, Özbəkin haqqında bəhs etdiyi oyunda ''Qalatasaray'' çox rahat qələbə qazanmış və hakimliklə bağlı heç bir ciddi qalmaqal yaşanmamışdı. Söhbət ötən mövsümün 2-ci turunda İstanbuldakı ''Trabzonspor''la oyundan gedir. ''Cim-Bom'' İkardinin hər hissədə vurduğu qol sayəsində 2:0 hesablı qələbə qazanmışdı. Əslində 2019-dan etibarən superliqa oyunlarına təyinat almağa başlayan 38 yaşlı Karaoğlanı hər iki nəhəng üçün uğurlu hakim saymaq olar. Məsələn, bu günə qədər ''Fənərbaxça'' onun idarəçiliyi altında keçirdiyi 18 oyunun 14-də qalib gəldiyi halda (2 heç-heçə, 2 məğlubiyyət) ''Qalatasaray'' 15 oyunun 10-da sevinən tərəf olub (2 heç-heçə, 3 məğlubiyyət).
ƏLİ
Digər xəbərlər
