Türkiyəli futbolsevərlər həftəsonunu böyük səbirsizliklə gözləyir.

Belə ki, bazar günü nəhənglər arasında mövsümün ilk derbisi baş tutacaq. ''Beşiktaş'' doğma ''Vodafon Park''da ''Fənərbaxça''nı qəbul edəcək. Son iki turda qələbəyə həsrət qalan ''Qartal'' həm uğursuzluq zolağından çıxmağa, həm də əzəli rəqiblərinə qarşı evdəki uğurlu seriyanı davam etdirməyə çalışacaq. Belə ki, ''ağ-qaralar'' 2016-da istifadəyə verilən ''Vodafon Park''da indiyə qədər ''Qalatasaray'' və ''Fənərbaxça''ya qarşı keçirdiyi 12 superliqa matçının heç birində uduzmayıb! Komanda bu müddətdə ''Qalatasaray''a qarşı 6 oyundan 5 qələbə, 1 bərabərlik, ''Fənərbaxça''ya qarşı isə 6 oyundan 2 qələbə, 4 bərabərliklə ayrılıb. Bu arenada yeganə derbi məğlubiyyəti 2017-nin fevralında kubokun 1/8 finalında ''Fənərbaxça'' ilə oyunda qeydə alınıb (0:1). Budəfəki derbini Volkan Bayarslan idarə edəcək.

Maraqlıdı ki, hər iki komanda indiyə qədər bu hakimin oyunlarında büdrəməyib. ''Beşiktaş'' Bayarslanla 7 rəsmi oyunun, ''Fənərbaxça'' isə 4 rəsmi oyunun hamısından qələbə ilə ayrılıb. Daha bir qeyd olunası fakt odu ki, İstanbul İdman Təhlükəsizlik Komitəsinin qərarı və iki klubun anlaşması sayəsində ''Vodafon Park''a ''Fənər'' fanatları buraxılmayacaq! Bənzər şəkildə 2-ci dövrədə ''Fənər''in meydanındakı derbiyə də ''Beşiktaş''lılar buraxılmayacaq.