Yığma fasiləsinin ardından yenidən bütün diqqətlər klub futboluna yönəlir.

“Football-plus.az” xəbər verir ki, bu həftə Türkiyə çempionatında 9-cu tur çərçivəsində mövsümün ilk böyük İstanbul derbisi baş tutacaq. 16 xalla 4-cü pillədə qərarlaşan “Beşiktaş” 22 xalla 2-ci pillədə olan “Qalatasaray”ın qonağı olacaq. Dünən derbi ilə bağlı mühüm bir xəbər gəldi. İstanbul İdman Təhlükəsizlik Komitəsinin qərarı ilə bu matçda səfər komandasının azarkeşləri də stadiona buraxılacaq. Yəni “Qartal” derbidə dəstəksiz qalmayacaq. Bilindiyi kimi, son illərdə tez-tez 4 klubun öz aralarındakı matçlarda səfər komandalarının stadiona girişinə qadağa qoyulurdu. Bu qadağa bu mövsüm 2-ci turda “Qalatasaray” – “Trabzonspor” və 5-ci turda “Trabzonspor” – “Beşiktaş” oyunlarında da qüvvədə saxlanılmışdı. Bu dəfə qadağanın aradan qaldırılması daimi xarakter daşımır. Bu, daha çox iki klubun istəyinin nəticəsidi. Belə ki, bugünlərdə “Qalatasaray” və “Beşiktaş” qərarın dəyişdirilməsi mövzusunda ortaq məxrəcə gəlib. Bunun ardından İstanbul valiliyi lazımi təhlükəsizlik tədbirlərinin görüləcəyini və derbiyə qonaq fanatların buraxılacağını klublara bildirdi. “Qalatasaray”ın rəsmisi Eray Yazqan bununla bağlı verdiyi açıqlamada belə demişdi: “Səfər qadağasının tətbiqi düzgün deyil. Uşaq vaxtı “İnönü”dəki derbilərdə tribunalar iki klubun azarkeşləri tərəfindən yarıbayarı dolurdu. Bəlkə də bu, indi bizə çox romantik görünür. Amma biz “Bavariya” və “Mançester Yunayted”in fanatlarını qəbul ediriksə, “Fənərbaxça” və “Beşiktaş”ın da fanatlarını qəbul etməliyik. Eləcə də bizim azarkeşlər səfər matçlarına getməlidi”. Onu da bildirək ki, “Rams Park”a “Beşiktaş”ın 2400 azarkeşi buraxılacaq.

Yeri gəlmişkən, derbinin hakimi də məlumdu. Bu prinsipial qarşılaşmanı Xəlil Umut Melər idarə edəcək. Hazırda Türkiyənin ən yaxşı hakimi sayılan 37 yaşlı Melər bu mövsüm superliqada 5-ci oyununa təyinat alıb. Maraqlıdı ki, “Qalatasaray”ın bu mövsüm xal itirdiyi yeganə qarşılaşmanı, 1-ci turda “Kayserispor”a qarşı səfər oyununu (0:0) məhz Melər idarə edib. Derbi performansına gəlincə, Melər buna qədər yalnız bir dəfə bu komandaların oyununa təyinat alıb. Ötən mövsümün 13-cü turuna təsadüf edən həmin görüşdə “Qalatasaray” “Beşiktaş”ı 2:1 hesabıyla yenmişdi. Ümumilikdə Melərin idarəçiliyində indiyə qədər “Qalatasaray” 23 oyundan 16 qələbə, 5 heç-heçə, 2 məğlubiyyət (derbilərdə 3 qələbə, 1 məğlubiyyət), “Beşiktaş” isə 22 oyundan 8 qələbə, 6 heç-heçə, 8 məğlubiyyətlə (derbilərdə 2 qələbə, 1 heç-heçə, 1 məğlubiyyət) ayrılıb.