''Fənərbaxça'' ilə ''Qalatasaray'' arasında superliqa çərçivəsində qolsuz başa çatan derbinin ardından bu dəfə gözlər superkuboka yönəlib.

“Football-plus.az” xəbər verir ki, əzəli rəqiblər indi də dekabrın 29-da Səudiyyə Ərəbistanının paytaxtı Ər-Riyadda məhz Türkiyə superkuboku uğrunda oyunda qarşılaşacaqlar. Türkiyə mətbuatının iddiasına görə ərəblər bu oyuna ev sahibliyi etməyin qarşılığında türklərə 100 milyon dollar təklif ediblər! Bunun 50 milyon dolları Türkiyə Futbol Federasiyasına çatacaqsa, İstanbul nəhəngləri nəticədən asılı olmayaraq hərəyə 25 milyon dollar qazanacaq. Bu arada bu matçın hakimi bəlli olub. Hakimlər Komitəsi derbini Abdülkadir Bitigenə tapşırıb. 40 yaşlı ədalət təmsilçisi 2014-cü ildən superliqa oyunlarına təyinat alır. 2021-dən isə o, FİFA hakimi statusundadı. Bitigen daha öncə 2 dəfə İstanbul derbilərində fit sahibi olub. 2020-nin martında qolsuz başa çatan ''Qalatasaray'' - ''Beşiktaş'' oyununu, eləcə də ötən mövsümün 37-ci turunda ''Qalatasaray''ın evdə ''Fənərbaxça''nı 3:0 məğlub etdiyi görüşü də bu hakim idarə edib. Ümumilikdə ''Cim-Bom'' Bitigen ilə keçirdiyi 19 oyundan 12 qələbə, 3 heç-heçə, 4 məğlubiyyət, ''Fənərbaxça'' isə 14 oyundan 11 qələbə, 1 heç-heçə, 2 məğlubiyyətlə ayrılıb.

ƏLİ