Superliqada bütün diqqətlər sabah baş tutacaq mövsümün şah oyununa yönəlib.

32-ci tur çərçivəsində ''Fənərbaxça'' ''Qalatasaray''ı qəbul edəcək. Son illərdə əzəli rəqiblərin oyununda maraqlı tendensiya müşahidə olunur. Belə ki, meydan sahibi rolunda çıxış edən komanda qalib gəlməkdə çətinlik çəkir. İlk dövrədə ''Fənər'' rəqib meydanında 2:1 hesabı ilə üstün olmuşdu. 2014-dən bəri əzəli rəqibini evdə yenə bilməyən ''Qalatasaray''ın qələbəsiz seriyası 7 oyuna çatmışdı. Amma Kadıköydə isə ''Fənərbaxça'' qalib gəlməkdə çətinlik çəkir.

''Ülkər'' stadionunda baş tutan son 4 qarşılaşmada 2 bərabərlik qeydə alınıbsa, digər 2 oyunda ''Qalatasaray'' sevinib. Özü də ''Cim-Bom''un bu qələbələri son 2 mövsümə təsadüf edib. Bu baxımdan Türkiyə çempionatı tarixində bir ilk yaşana bilər. ''Qalatasaray'' yenə qalib gəlsə, ''Fənərbaxça''nı səfərdə ardıcıl 3 çempionat oyununda məğlub edən ilk komanda olacaq! ''Sarı-lacivərdlilər'' indiyə qədər Türkiyə çempionatında evdə 73 fərqli komanda ilə qarşılaşıb və onlardan heç birinə ardıcıl 3 il yenilməyib. ''Fənər''in evdə ''Qalatasaray''ı sonuncu dəfə 2016-nın noyabrında Dik Advokatın başçılığı altında Van Persinin dublu sayəsində 2:0 hesabı ilə yendiyini bildirək.