Sinner və Sobolenko!
“US Open”də mübarizə başa çatdı.
Kişilər arasında turnirin finalında italiyalı Yannik Sinnerlə amerikalı Teylor Frits qarşılaşdı. 2 saat 17 dəqiqə davam edən görüşdən Sinner qalib ayrıldı. O, karyerasında ilk dəfə “US Open”in qalibi oldu. 23 yaşlı italiyalı buna qədər “Australian Open”i də qazanıb, həmçinin “Uimbldon” və “Rolan Qarros” turnirlərində yarımfinala çıxıb.
Sinner amerikalı Cimmi Konnors (1974) və argentinalı Gilyermo Vilasdan (1977) sonra bir mövsüdə ilk iki “Böyük dəbilqə” qazanan 3-cü tennisçidi.
Qadınlar arasında turnirin finalına gəlincə, belaruslu Arina Sobolenko amerikalı Cessika Pequlaya qalib gəldi. Belaruslu tennisçi bu il “Australian Open”i və Sinsinnati turnirini də qazanıb, ümumilikdə onun hesabında üç “Böyük dəbilqə” qələbəsi var.
Kişilər
fərdi, yarımfinal
Sinner (İtaliya, 1) - Dreper (B.Britaniya, 25) 7:5, 7:6 (7:3), 6:2
Frits (ABŞ, 12) - Tiafo (ABŞ, 20) 4:6, 7:5, 4:6, 6:4, 6:1
final
Sinner (İtaliya, 1) - Frits (ABŞ, 12) 6:3, 6:4, 7:5
cütlərin yarışı, yarımfinal
Kravits/Pyuts (Almaniya, 10) – Arevalo/Paviç (Salvador/Xorvatiya, 4) 6:3, 6:7 (9:11), 6:4
Persell/Tompson (Avstraliya, 7) – Lemmons/Uistrou (ABŞ, 13) 6:4, 7:6 (7:4)
final
Persell/Tompson – Kravits/Pyuts 6:4, 7:6 (7:4).
Qadınlar
fərdi, final
Sobolenko (Belarus, 2) - Pequla (ABŞ, 6) 7:5, 7:5
cütlərin yarışı, final
L.Kiçenok/Ostapenko (Ukrayna/Latviya, 7) – Mladenoviç/Çjan Şuay (Fransa/Çin) 6:4, 6:3.
Mikst, final
Errani/Vavassori (İtaliya, 3) – Taunsend/Yanq (ABŞ, WC) 7:6 (7:0), 7:5
“US Open”in ardından dünyanın aparıcı kişi və qadın tennisçilərinin növbəti reytinq cədvəli də açıqlanıb. Kişilərin sıralamasında Aleksandr Zverev Karlos Alkarası arxada qoyaraq 2-ci pilləyə yüksəlib, Novak Cokoviç isə ilk “3-lüy”ü tərk edib. Zirvədə “US Open”i də qazanan Sinner qərarlaşıb. O, ən yaxın izləyicisindən 4105 xal irəlidədi.
ATP ilə yanaşı, WTA da yeni reytinqi açıqlayıb. Qadınlar arasında İqa Sventek liderliyi, Sobolenko 2-ci pilləni qoruyub. “US Open”də finala qədər irəliləyən Pequla 6-cı pillədən 3-cü pilləyə yüksəlib.
ATP reytinqi
1 (1*). Yannik Sinner (İtaliya) 11180
2 (4). Aleksandr Zverev (Almaniya) 7075
3 (3). Karlos Alkaras (İspaniya) 6690
4 (2). Novak Cokoviç (Serbiya) 5560
5 (5). Daniil Medvedev (Rusiya) 5475
6 (6). Andrey Rublev (Rusiya) 4645
7 (12). Teylor Frits (ABŞ) 4060
8 (7). Xubert Xurkaç (Polşa) 4060
9 (8). Kasper Ruud (Norveç) 4010
10 (9). Qriqor Dimitrov (Bolqarıstan) 3965
WTA reytinqi
1 (1). İqa Sventek (Polşa) 10885
2 (2). Arina Sobolenko (Belarus) 8716
3 (6). Cessika Pequla (ABŞ) 6220
4 (4). Yelena Rıbakina (Qazaxıstan) 5871
5 (5). Jasmin Paolini (İtaliya) 5398
6 (3). Kori Qauff (ABŞ) 4983
7 (7). Çjen Sinven (Çin) 3980
8 (12). Emma Navarro (ABŞ) 3810
9 (10). Barbora Kreyçikova (Çexiya) 3631
10 (9). Mariya Sakkari (Yunanıstan) 3515
* - əvvəlki reytinqdə yerini göstərir.
Reaksiyalar
Yannik Sinner:
“Düşünürəm ki, pis çıxış etmədim. Bu titul mənim üçün çox şey deməkdi, ona görə ki, karyeramın son dönəmi həqiqətən çətin alınıb. Tennisi sevirəm, çox məşq edirəm. Xüsusən də bu turnirdə tennisdə psixologiyanın nə qədər böyük önəm daşıdığını anladım. Çox xoşbəxtəm, bu sevinc anını sevimli komandamla bölüşdüyümə görə qürur duyuram”.
Arina Sobolenko:
“Oy, Allahım, indi heç söz tapa bilmirəm. Dəfələrlə qələbəyə yaxın olduğumu düşünmüşəm. Bu, mənim arzum idi. Nəhayət, bu gözəl qəniməti qazandım. Titulun mənim üçün önəmi böyükdü, çətin həftələr arxada qaldı. Finalda uduzmağın necə ağır olduğunu bilirəm, Cessika. Sən möhtəşəm tennis sərgiləyirsən. Bu titulu qazanacağına inanıram. Bəlkə də bir yox, bir neçə dəfə. Atamı itirəndən (Sergey Sobolenko 2019-cu ilin noyabrında 43 yaşında vəfat edib) sonra hədəfim o idi ki, soyadımızı tennis tarixinə yazdıraq. Adımı qənimətin üzərində görəndə bu arzudan əl çəkməyə imkan verməyən ailəmlə qürur duyuram”.
Digər xəbərlər
