Mövsümün “Böyük dəbilqə” seriyalı ilk turnirinə bazar günü yekun vuruldu.

Şənbə günü qadınların turnirində final oyunu keçirildi. Dünyanın 15-ci raketkası Çjen Sinven indiyə qədər karyerasında heç vaxt WTA reytinqində ilk “3-lük”də olan rəqibə qalib gəlməmişdi. Ənənə bu dəfə də pozulmadı. Belaruslu Arina Sobolenko cəmi 1 saat 15 dəqiqə davam edən oyunda çinli rəqibinə qalib gəlməklə titulunu qorudu.

Elə kişilərin turnirində də maraqlı bir tendensiya qorundu. Daniil Medvedev karyerasında 3-cü dəfə “Australian Open”in finalında oynadı və yenə uduzdu. 27 yaşlı rusiyalı tennisçi 2021-ci ildə Novak Cokoviç, 2022-ci ildə isə Rafael Nadal ilə bacarmamışdı. Daha bir maraqlı məqam var. Medvedev Açıq era dövründə iki “Böyük dəbilqə” turnirinin finalında hesabda 2:0 önə çıxandan sonra uduzan ilk tennisçidi. O, 2022-də - ispaniyalı Nadalla dueldə də ilk iki setdə qalib gəlmişdi.

Karyerasında ilk dəfə “Böyük dəbilqə”nin finalına yüksələn və qələbə qazanan Yannik Sinner Medvedevə bunları dedi: “Səni finalda oynamağın münasibəti ilə təbrik edirəm. Finala qədər olan yolda möhtəşəm oyun göstərdin. Ümid edirəm ki, nə vaxtsa bu turniri qazanacaqsan. Sən buna layiqsən”.

Medvedevin oyunsonrası fikirləri: “İlk növbədə Yanniki təbrik edirəm. Sən niyə bunu haqq etdiyini göstərdin. Sənin ilk “Böyük dəbilqə” turnirindi, ümid edirəm ki, növbəti dəfə sənə qalib gələ biləcəm. Hər kəsə təşəkkür etmək istərirəm. Möhtəşəm iki həftə idi. Finalda uduzmaq acıdı, ancaq daha tez uduzmaqdan yaxşıdı. Bundan sonra da yorulmadan çalışacam”.

22 yaşlı Sinner bu qələbəyə görə 2 milyon 153 min dollar qazandı. Medvedevin bəxtinə isə 1 milyon 179 min dollar düşdü. Ancaq rusiyalı 2-ci mərhələdə - Emil Ruusuvuori ilə görüşdə qeyri-idmani davranışa görə 9 min dollar cərimə ödəməli olacaq.

final
Kişilər
Sinner (İtaliya, 4) - Medvedev (Rusiya, 3) 3:6, 3:6, 6:4, 6:4, 6:3
Qadınlar
Sobolenko (Belarus, 2) - Çjen Sinven (Çin, 12) 6:3, 6:2
Kişilər, cütlər
Bopanna/Ebden (Hindistan/Avstraliya, 2) – Bolelli/Vavassori (İtaliya) 7:6 (7:0), 7:5
Qadınlar, cütlər
Se Suvey/Mertens (Tayvan/Belçika, 2) – L.Kiçenok/Ostapenko (Ukrayna/Latviya, 11) 6:1, 7:5.
Mikst
Se Suvey/Zelinski (Tayvan/Polşa, 3) – Kravçik/Skupski (ABŞ/B.Britaniya, 2) 6:7 (5:7), 6:4, 11:9.