Mövsümə uğursuz başlayan və əvvəlcə Avropa Liqasında, sonra da Konfrans Liqasında mübarizəni dayandıraraq avrokuboklardan kənar qalan ''Trabzonspor''da gözlənilən ayrılıq baş verdi.

Az qala hər matçda fanatlar tərəfindən istefaya dəvət olunan Abdulla Avcı ilə yollar rəsmən ayrıldı. Beləliklə, Türkiyənin 4-cü nəhəngində 2-ci Avcı dönəmi başa çatdı. İlk dönəmində bir çempionluq olmaqla 3 titul qazanan təcrübəli mütəxəssisin 2-ci dönəmi 2023-ün oktyabrında başlamışdı. Düzdü, komanda ötən mövsümü pis keçirməyərək 3-cü pilləni tutdu və kubokda finala yüksəldi. Amma yeni mövsümdə işlər qaydasında getmədi. Komanda bu məşqçinin 2-ci dönəmində keçirdiyi 44 rəsmi oyundan 25 qələbə, 6 heç-heçə, 13 məğlubiyyətlə ayrılmış oldu.

Avcını əvəzləməyə əsas namizədlər Şenol Günəş ilə Fatih Təkkədi. Günəş bilindiyi kimi 4 fərqli dönəmdə trabzonluları çalışdırıb və 2 kubok, 2 superkubok olmaqla 4 titul qazanıb. Hazırda ''Alanyaspor''u çalışdıran Təkkə yeni nəsil məşqçilərdən hesab olunur. O, indiyə qədər çalışırdırdığı ortabab klublarda öz nəticələri ilə diqqət çəkməyi bacarıb. Bu üzdən fanatlar məhz onun təyinatının tərəfdarıdı. Bu arada ''A Spor'' kanalının məlumatına görə ''Trabzonspor'' aparıcı oyunçularından olan Mahmud Trezeqe ilə də vidalaşıb. Misirli futbolçu icarə əsasında Qətər təmsilçisi ''Əl-Rayyan''a yollanıb.

ƏLİ