Son 10 mövsümün 6-da çempion olan məşqçi klubundan ayrılıb

Cəmi 10 ay əvvəl “Trabzonspor” fanatları bəlkə də dünyada ən xoşbəxt insanlar idi. Komanda 38 illik həsrətə son qoyub çempion olandan sonra trabzonluların çempionluq tədbirində yaratdıqları gözəl mənzərə bütün dünyada gündəm olmuşdu. Amma komandanın Türkiyə futbolundakı hegemonluğu uzun çəkmədi. Mövsümün sonuna təxminən 3 ay qalsa da, komanda ölkə kubokundan başqa bütün turnirlərdən əlini üzüb. Son bir həftə trabzonlular üçün kabus kimi keçdi. Martın 3-də başqan Ahmet Ağaoğlu istefa verdisə, 1 gün sonra debütant “Ümraniyəspor”a 1:2 hesablı məğlubiyyətlə komandanın superliqada evdəki 36 oyunluq məğlubiyyətsiz seriyası qırıldı. Əsas xəbər isə martın 7-də gəldi. Uğursuz nəticələrə görə zatən üzərində böyük təzyiq olan baş məşqçi Abdulla Avcı yeni rəhbərliyin önünü açmaq üçün istefa vermək qərarına gəldi. 59 yaşlı mütəxəssis sosial şəbəkədəki səhifəsində olduqca duyğusal bir vida mesajı yazaraq istefasını rəsmən açıqladı. Xatırladaq ki, Avcı bu vəzifəyə 2020-ci il noyabrın 10-da gəlmişdi. İlk mövsümdə 17-ci yerdə qəbul etdiyi komandanı 4-cü pilləyə qədər yüksəltməklə diqqəti çəkən mütəxəssis həm “Trabzonspor”da, həm də məşqçi karyerasında ən böyük uğurunu 2021/22-də qazandı. Məhz bu tarixi çempionluq üzündən Avcının klubdakı dönəmi daim uğurlu şəkildə xatırlanacaq. Çempionluqdan başqa qaradənizlilər bu məşqçi ilə iki dəfə ölkə superkubokuna da sahib çıxdılar. Yəni 28 aylıq dönəm üç titulun qazanılması ilə nəticələndi. Ümumilidə “bordo-mavililər” Avcının dönəmində keçirdikləri 116 rəsmi oyundan 65 qələbə, 29 heç-heçə, 22 məğlubiyyətlə ayrılmış oldular. Çempionat çərçivəsində komanda 93 oyundan 52 qələbə, 28 heç-heçə, 13 məğlubiyyətlə ayrılaraq orta hesabla hər oyunda 1,98 xal toplamış oldu. Bu, “Trabzonspor” tarixində ən azı 25 oyuna çıxan məşqçilər arasında ən yaxşı ikinci göstəricidi. Lider Şenol Günəşdi (2).

İndi bütün diqqətlər yeni məşqçinin axtarışına yönəlib. Ahmet Ağaoğlunun istefasından sonra onun səlahiyyətlərini müvəqqəti icra edən və artıq prezidentliyə namizədliyini rəsmən irəli sürən vitse-prezident Ərtuğrul Doğan bəzi məşqçilərlə görüşüb. Qısaca qeyd edək ki, bir neçə daşınmaz əmlak şirkətinə malik olan 45 yaşlı Doğan 2018-ci ildən klubdadı. Onun əsas namizədi Sərgən Yalçındı. Amma 15 aydı işsiz olan və ən son “Konyaspor”un təklifini geri çevirən Sərgən “TV100” kanalına verdiyi qısa açıqlamada “Trabzonspor”dan heç bir təklif almadığını deyib. Yalçın daha öncə 2000/01 mövsümündə futbolçu kimi “Trabzonspor”un şərəfini qoruyub. Sərgəndən başqa yerlilər məşqçilərdəın İlhan Palut, Çağdaş Atan, Fatih Təkkə, Ünal Karaman, əcnəbilərdən isə Slaven Biliç və Cennaro Qattuzonun adı namizədlər arasında hallanır.

Yeri gəlmişkən, Avcının istefasından sonra Türkiyə futbolunda yaşanan qəribə tendensiya yenidən müzakirə mövzusuna çevrilib. Söhbət son çempion statusunda olan məşqçilərin işini itirməsindən gedir. Ardıcıl 3-cü, son 10 mövsümdə isə 6-cı dəfə çempion məşqçi klubundan ayrıldı! Bu qəribə tendensiyanın əsası 2013/14-də qoyulub. 2012/13-də “Qalatasaray”la ardıcıl 2-ci, məşqçi karyerasında 6-cı çempionluğunu qazanan Terim o dönəmin başqanı Ünal Aysal ilə fikir ayrılığı üzündən 2013/14-ün 5-ci turunda istefaya göndərildi. 2013/14-də “Fənərbaxça”ya çempionluq yaşadan Ərsun Yanal növbəti mövsüm başlamamış Əziz Yıldırım tərəfindən qovuldu. 2014/15-də “Qalatasaray”a tarixinin 20-ci çempionluğunu qazandıran Həmzə Həmzəoğlu 2015/16-nın 11-ci turunda istefaya göndərildi. Sonrakı 4 mövsüm bu baxımdan sakit keçdi. Hərəyə 2 çempionluq qazanan Şenol Günəşlə Fatih Terim öz vəzifələrində qaldılar. Amma 2020/21-dən etibarən yenə çempion məşqçilər sanki lənətlənməyə başlandı. Əvvəlcə Okan Buruk “İstanbul BŞ”dən, sonra Sərgən Yalçın “Beşiktaş”dan, indi də Avcı “Trabzonspor”dan ayrıldı.

Yəni son 10 ildə Türkiyə futbolunda çempion olandan sonra ayrılmayan yalnız iki məşqçi var: Günəş və Terim!