“Trabzonspor”dan, nəhayət, gözlənilən xəbər gəldi.

"Football-plus.az" xəbər verir ki, son günlərdə Nenad Byelitsa ilə təzminatla bağlı aparılan danışıqlar başa çatdı və srağagün xorvatiyalı mütəxəssislə yollar ayrıldı.

Klubla 2025-ə qədər müqaviləsi olsa da, ona yalnız bu mövsüm üçün məvacibi, yəni 1,6 milyon avro ödəniləcək. Byelitsanın bu mövsüm cəmi 8 oyunda vəzifəsini icra etdiyini nəzərə alsaq, belə çıxır ki, onun bir oyunu komandaya 200 min avroya başa gəldi! 52 yaşlı mütəxəssisin bu klubdakı dönəmi cəmi 177 gün çəkdi. Ümumiyyətlə, qeyd etmək yerinə düşər ki, “Trabzonspor”un tarixi ərzində əcnəbi mütəxəssislərin böyük əksəriyyəti uğursuzluğa düçar olub və qısa müddət sonra qovulub. Komanda elitaya yüksəldiyi 1974-dən bəri 45 fərqli məşqçi ilə çalışıb. Onlardan 11-i əcnəbi olub. Bu məşqçilərin arasında ən uzun müddət çalışan belmikalı Urbeyn Braems olub. Amma o, iki fərqli dönəmdə (1989-90, 1991-92) işləyib və klubun başında ümumilikdə 80 oyuna çıxıb. Digər əcnəbilər arasında ən çox (43) oyuna çıxan Corc Leykens (1992-93) olub. Byelitsa isə komandanı yalnız 16 oyunda meydana çıxara bildi. O, son açıqlamasında “Reyncers”lə danışıqlar apardığını vurğulayıb. Bu, cari mövsüm 8 turu geridə qalan superliqada reallaşan 9-cu istefa oldu!

İstefa ilə bağlı rəsmi açıqlamadan qısa müddət sonra yeni təyinatla bağlı açıqlama gəldi. Gözlənildiyi kimi, bu vəzifəyə martın 7-də istefa verən Abdulla Avcı gətirildi. Dərhal İstanbuldan Trabzona gələn 60 yaşlı mütəxəssis hava limanında jurnalistlərə “yeni gəlmədim, geri gəldim” açıqlamasını verdi. Klub rəhbərliyinə ona güvəndiyi üçün təşəkkür edən Avcı əvvəlki kimi yüksək enerji ilə işə başlayacaqlarını əlavə etdi. Dünən ilk məşqinə çıxan Avcı üçün gələn həftə mətbuat konfransı və imza mərasimi keçiriləcək. Maraqlıdı ki, klubdan verilən açıqlamada Avcının heç bir məbləğ tələb etmədiyi və boş kağıza imza atdığı qeyd olundu. Amma Türkiyə mətbuatında təyinatın detalları barədə məlumat verilib. Müqavilənin ikiillik olacağı gözlənilir. Avcı ilk dönəmində, yəni 2020-də də ikiillik müqaviləyə imza atmışdı. Onun illik məvacibi isə 1,2 milyon avro civarında olacaq. Xatırladaq ki, Avcı ilk dönəmində “Trabzonspor”a 1 çempionluq, 2 superkubok olmaqla 3 titul qazandırmışdı. Bu, eyni zamanda onun məşqçilikdə klub karyerasının da ilk titulları idi. “Bordo-mavililər” 2021/22-də 81 xalla çempion olaraq məhz Avcı ilə 38 illik həsrətə son qoymuşdu.