Bu gün "Qarabağ" ÇL-in pley-off mərhələsinin cavab matçında "Dinamo"nu qəbul edəcək. "Köhlən atlar"ın isə böyük ümidlə irəli atılacağı bəllidi.

Bəs həmin oyunda ədaləti kim təmsil ediləcək?

Maykl Oliver... Maykl 14 yaşından sonra atasının, yəni Klayv Oliverin peşəsinə maraq göstərməyə başlayıb. İngiltərəli ədalət təmsilçisi karyerasına ölkəsinin Şimal liqasında başlasa da, tezliklə premyer-liqada şans qazanıb. 39 yaşlı Oliver elita klublarının 374 oyununu idarə edib ki, 1220 sarı, 51 qırmızı vərəqə göstərib. 2012-ci ildə FİFA referisi statusu qazanan hakim zəngin beynəlxalq karyeraya malikdi. Çempionlar, Avropa, Konfrans, Millətlər Liqasında, beynəlxalq yoldaşlıq oyunlarında ədaləti qorumaqla yanaşı, AÇ-2020 və AÇ-2024-də iş başında olub. Oliverin adının hallandığı ən böyük qalmaqal Çempionlar Liqasının 2017/18 mövsümünün 1/4 final mərhələsi çərçivəsində keçirilən "Real" - "Yuventus" matçında yaşanıb. İlk oyunda 3:0 hesabıyla qalib gələn madridlilər cavab görüşündə son dəqiqələrə qədər 3 cavabsız qol buraxıb. Oliverin final fitindən əvvəl “Real”ın xeyrinə penalti təyin etməsi, qonaqların qapıçısı Buffona "qırmızı" verməsi və Ronaldonun həmin cərimə zərbəsi sayəsində fərqlənməsi aləmi bir-birinə qatıb. İdarəçiliyinə görə italyanların qəzəbinə düçar olan ədalət təmsilçisi aylarla ailəsiylə birgə təhdid və təhqirlərə məruz qalıb. Hətta onu qorxutmaq istəyən bəzi azarkeşlər evinə qədər gələrək insidentlərə səbəb olub. Bu hakim ilk dəfə təmsilçilərimizdən birinin oyununa təyinat alıb.

Oliver karyerası ərzində 709 matç idarə edib. O, bu görüşlərdə 2296 sarı, 102 qırmızı vərəqəylə futbolçuları üzüb.

KƏNAN BAHADIR