“Bayer-04”lə “Qarabağ” arasında keçiriləcək Avropa Liqasının qrup mərhələsinin 3-cü tur oyununun təyinatları bəllidi.

"Football-plus.az" xəbər verir ki, qarşılaşma Rumıniyadan olan hakimlər briqadasına tapşırılıb. FIFA referisi Horatsiu Fesnikə laysman qismində Valentin Avram və Aleksandru Çerey kömək edəcək. Dördüncü hakim funksiyasını Sabolş Kovaç yerinə yetirəcək. VAR-da portuqaliyalı Tyaqu Martinslə italiyalı Paolo Valeri olacaq.

Bu gün “Qarabağ”ın favoritlə qarşılaşacağını nəzərə alsaq, hakim qərarlarının önəmi böyükdü. Görəsən, ədalət güvənli əllərdədi?

Horatsiu Fesnik... 34 yaşlı referi karyerasına 2006-cı ildə başlayıbsa, 2016-cı ildə FİFA referisi adını alıb. Əsasən ölkəsinin superliqa matçlarında ədaləti qoruyub. Rumıniyanın əsas çempionatında 126 oyun idarə edən “fit sahibi” 669 sarı, 35 qırmızı vərəqə göstərib. Ona bəzi hallarda aşağı dəstələrin görüşlərində də rast gəlmək mümkündü. Bundan başqa, Çempionlar, Avropa, Konfrans, Gənclər liqalarında, beynəlxalq yoldaşlıq oyunlarında, həmçinin 17, 19, 21 yaşlı futbolçular arasında Avropa çempionatının seçmə mərhələlərində meydana çıxıb.

Maraqlıdı ki, Horatsiu 4-cü dəfə Azərbaycan komandasının matçını idarə edəcək. O, iki dəfə baş, bir dəfə isə ehtiyat hakim kimi ölkəmizə təşrif buyurub. 2017-ci ildə “Qarabağ” U-19-unun Gənclər Liqasında “Roma”yla (İtaliya) ev matçında ədaləti təmsil edib. “Azərsun Arena”da keçirilən oyunda qonaqlar təmsilçimizi məğlub edib – 3:0. Referi ölkəmizə növbəti dəfə 2019-cu ilin martında gəlib. Həmin görüşdə Nikola Yurçeviçin çalışdırdığı yığma “Neftçi Arena”da (o dönəm “Bakcell Arena” – red.) Litva ilə yoldaşlıq oyununda “sülh”ə razılaşıb – 0:0. Hakim bu qarşılaşmada Maksim Medvedevlə Dmitri Nazarova sarı vərəqə göstərib. Nəhayət, Horatsiunun Azərbaycana sonuncu səfəri cari mövsümə təsadüf edir. Konfrans Liqasının 2-ci təsnifat mərhələsində “Qəbələ” – “Omoniya” (Cənubi Kipr) matçında da sözügedən ədalət təmsilçisini görmüşük. O, qonaqların qələbə qazandığı (2:3) oyunun 4-cü hakimi olub. Beləliklə, rumıniyalı ilk dəfə təmsilçimizin səfər görüşündə iş başında olacaq. Ümid edirik ki, ölkəmizdə düşərli olmayan hakimdən, heç olmasa, səfərdə fayda görəcəyik.

Ümumiyyətlə, Horatsiu indiyə qədər 272 matç idarə edib. O, karyerası boyunca 1316 sarı, 74 qırmızı vərəqə göstərib.

KƏNAN BAHADIR