Bu gün Konfrans Liqasındakı təmsilçilərimiz 3-cü təsnifat mərhələsinin ilk oyunu çərçivəsində meydana çıxacaq.

Bilindiyi kimi, “Sabah”ın “Sent-Patriks”lə oyununda islandiyalı Vilyalmur Torarinsson ədaləti təmsil edəcəksə, “Zirə” – “Osiyek” görüşü yunanıstanlı Aristotelis Diamantopulosa həvalə olunub.

Elə isə "football-plus.az"ın ənənəvi hakim təqdimatına keçid alaq. Görək, komandalarımızın aqibəti əmin əllərdədimi?

Vilyalmur Torarinsson. İslandiyalı ədalət təmsilçisi 39 yaşındadı. Hakim karyerasına 2010-cu ildə İsveçin ikinci divizionunda başlayan Torarinsson 5 il sonra FİFA referisi ola bilib. Bu vaxta qədər superliqada 194 matç idarə edən hakim” 841 sarı, 40 qırmızı vərəqəylə futbolçuları cəzalandırıb. Beynəlxalq oyunlara gəlincə, burda bir qədər zəngin təcrübəyə malikdi. Hələ Çempionlar Liqasında debüt etməyən hakimə qalan beynəlxalq turnirlərdə güvənilib. Onun ölkəmizlə bağlı xatirəsi isə ürəkaçan deyil. Belə ki, 2017-ci ildə 21 yaşadək futbolçular arasında Avropa çempionatının seçmə mərhələsinin Almaniya – Azərbaycan matçını idarə edən Vilyalmur Samir Ələkbərovun çalışdırdığı millimizin 1:6 hesablı məğlubiyyətinə şahid olub. Ümumiyyətlə, sözügedən hakim indiyə qədər 393 oyun idarə edib. O, bu matçlarda 1629 sarı, 82 qırmızı vərəqə göstərib.

Aristotel Diamantopulos.41 yaşı olsa da, arzulanan səviyyədə təcrübəyə malik deyil. Bu baxımdan “Zirə”ni digər təmsilçilərimizə nisbətən bəxtsiz saya bilərik. Yenə də Aristoteli tanımağa dəyər. Karyerasına Yunanıstanın aşağı liqasında başlayan Aristotel yüksək liqada 83 oyun idarə edib, 401 sarı, 9 qırmızı vərəqə göstərib. Beynəlxalq görüşlərə gəlincə, Çempionlar, Avropa, Konfrans və Gənclər Liqalarında fit çalıb. AÇ-nin seçmə mərhələlərində də şans qazanan yunan referinin yolu bir dəfə əsas yığmamızla kəsişib. Söhbət AÇ-2024-ün seçmə mərhələsinin Azərbaycan – Avstriya oyunundan (0:1) gedir. Qeyd edək ki, həmin oyun Avstriyanın AÇ-yə vəsiqə qazanmasıyla yadda qalıb. Ümumiyyətlə, Diamantopulos karyerası ərzində 163 oyunda şans qazanıb, bu matçlarda 756 sarı, 21 qırmızı vərəqə göstərib.

KƏNAN BAHADIR