Avropa Liqasının 1/8 final mərhələsinin “Qarabağ” – “Bayer-04” matçına təyinat alan fransalı Benua Bastyen ilk dəfə təmsilçimizin oyununu idarə edəcək.

Amma 2014-cü ildən FİFA referisi olan ədalət təmsilçisi daha əvvəl Leverkuzen klubunun avrokubok görüşündə iş başında olub. O, “aspirinlər”in 2019/20 mövsümündə evdə İtaliya təmsilçisi “Yuventus”a uduzduğu (0:2) Çempionlar Liqasının qrup mərhələsinin oyununa təyinat alıb. Bastyen cari mövsüm Çempionlar Liqasının təsnifat mərhələsində bir, qrupunda iki, Avropa Liqasının qrupunda isə iki matç idarə edib.

Detallara nəzər salsaq, ədalət təmsilçisi Fransa çempionatının əsas simalarındadı. O, ölkəsinin elitasında 235 dəfə meydanda olub. Bu görüşlərdə 934 sarı, 63 qırmızı vərəqə göstərib. Əlbəttə, aşağı liqalar və kubok matçlarına da xeyli təyinat alıb. Beynəlxalq oyunlara gəlincə, 17, 19 və 21 yaşadək futbolçuların Avropa çempionatı sınaqları və Çempionlar (14), Avropa (20) və Konfrans Liqasının (4) oyunlarında iş başında olub. Siyahıya beynəlxalq yoldaşlıq oyunlarını, Millətlər və Gənclər Liqası kimi turnirlərin oyunlarını da daxil etmək mümkündü. Qısası, 40 yaşlı referinin zəngin təcrübəsi var. Diqqətçəkən məqam isə 2023/24 mövsümünün məğlubedilməz “Bayer-04”ün məğlubiyyətinə şahidlik etməsidi. Təki ikinci dəfə də eyni hadisənin iştirakçısı olsun.
Ümumiyyətlə, Bastyen karyerası ərzində 441 matçda ədaləti qoruyub, bu oyunlarda 1684 sarı, 114 qırmızı vərəqə göstərib.

KƏNAN BAHADIR