Bu gün Leverkuzendə “Bayer-04” ilə “Qarabağ” arasında keçiriləcək Avropa Liqasının 1/8 final mərhələsinin cavab oyununun təyinatları bəllidi.

Belə ki, qarşılaşma İngiltərədən olan hakimlər briqadasına tapşırılıb. Matçın baş hakimi FİFA referisi Entoni Teylor olacaq. Matçın taleyinin, sadəcə, komandaların performansından deyil, həm də ədalət təmsilçisinin peşəkarlığından asılı olduğunu bilirik. Üstəlik meydana çıxan komandalar arasında ciddi səviyyəsi fərqi varsa və hakimin mümkün simpatiyası qüvvələr nisbətini bir qədər də poza bilərsə... "Football-plus.az"ın ənənəvi hakim təqdimatı hazırdı. İngiltərəli referi ilə yaxından tanış olaq.

Entoni Teylor... Hakim karyerasına 2002-ci ildə ölkəsinin həvəskar liqalarında başlayıb. 2010-cu ildə İngiltərənin seçilmiş hakimlər qrupuna salınıb. Elə premyer-liqadakı ilk matçı da bu dönəmə təsadüf edib. Sözügedən çempionatda indiyə qədər 364 oyun idarə edən Teylor 1312 sarı, 51 qırmızı vərəqə göstərib. Beynəlxalq sınaqlara gəlincə, 45 yaşlı ingiltərəli hakim 2013-cü ildən bu tipli qarşılaşmalarda iş başında olur. Karyerası ərzində dünya çempionatı, Çempionlar, Avropa və Konfrans Liqasının oyunlarında ədaləti təmsil edib. Həmçinin Millətlər Liqasının A və B liqalarında, beynəlxalq yoldaşlıq oyunlarında, 19 və 21 yaşadək futbolçular arasında Avropa çempionatının görüşlərində meydanda olub. Təcrübəli referi cari mövsümdə İngiltərə premyer-liqasının 20, Çempionlar Liqasının 3 görüşünü idarə edib.

Maraqlıdı ki, Teylor ilk dəfə Azərbaycan təmsilçisinin matçında iş başında olacaq. O, əsas millimizin 2013-cü ildə Portuqaliyaya 0:2 hesabıyla uduzduğu DÇ-2014-ün seçmə oyununda Bakıya gəlib. Referi həmin vaxt dördüncü hakim funksiyasını yerinə yetirib. “Fit sahibi” 2023/24 “futbol ili”ndə Avropa Liqasında “Qalatasaray”ın Çexiyada “Sparta”ya uduzduğu (1:4) pley-off mərhələsinin cavab görüşünü idarə edib. Antoni bu matçda 2 qırmızı, 7 sarı vərəqəyə ehtiyac duyub.

Bundan başqa, Teylor ötən mövsüm Çempionlar Liqasının 3-cü təsnifat mərhələsinin “Portu” - “Bayer-04” oyununu idarə edib – 0:2. Hətta leverkuzenlilerin oyunçusu Ceremi Frimponq bu matçın 88-ci dəqiqəsində “qırmızı” alıbsa, qapıda hazırda “Qarabağ”ın formasını geyən Andrey Lunyov dayanıb. Entoni Avropa Liqasının 2021/22 mövsümünün “Bayer-04” – “Betis” (4:0) oyununda da meydanda olub.
Ümumiyyətlə, ədalət təmsilçisi karyerası ərzində 722 oyun idarə edib. O, bu matçlarda 2580 sarı, 131 qırmızı vərəqə üçün əlini cibinə atıb. Ümid edək ki, “Qarabağ”la ilk görüşü bizim üçün uğurlu olacaq.

KƏNAN BAHADIR