Çempionlar Liqasındakı təmsilçimiz bu gün pley-off mərhələsində "Dinamo"ya qarşı ilk oyununu keçirəcək. “Qarabağ” Çempionlar Liqasının liqa mərhələsi üçün səfərdən qələbəylə dönməyə çalışacaq. Düzdü, cütün taleyi, yəqin ki, cavab oyunlarında bilinəcək. Lakin bu, birinci matçda da ədalətin qorunmasının vacibliyinə təsir etmir.

Bəs komandaların layiqli nəticə uğrunda mübarizəsi əmin əllərdədi?

Qlenn Nyuberq: ədalət təmsilçisi olmaq qərarını köməkçi hakim olan atasından ilhamlanaraq verib. 35 yaşlı referi karyerasına İsveçin aşağı liqalarında başlayıb ki, 2008-ci ildə peşəkar hakim statusuna yiyələnib. 2013-cü ildən ölkəsinin premyer-liqa matçlarında çıxış edən “fit sahibi” 3 ildən sonra FİFA-dan beynəlxalq dərəcəli hakim dərəcəsini alıb. Elita klublarının 231 matçını idarə edib ki, burda 698 sarı, 26 qırmızı vərəqə üçün əlini cibinə atıb. Nyuberq zəngin təcrübəyə malikdi. O, Çempionlar, Avropa, Konfrans, Gənclər və Millətlər Liqasının qarşılaşmalarıyla yanaşı, Olimpiada və beynəlxalq yoxlama oyunlarında da ədaləti qoruyub. Karyerası ərzində dəfələrlə baş məşqçilərin tənqidinə məruz qalan Nyuberq sonuncu dəfə “Bavariya”nın sabiq çalışdırıcısı Tomas Tuxellə qalmaqal yaşayıb. Mütəxəssis Nyuberqi ötən mövsüm Çempionlar Liqasının 1/4 final mərhələsində “Arsenal”a qarşı matçda penalti təyin etmədiyinə görə günahlandırıb. Ədalət təmsilçisi AÇ-2024-də üç oyun, 17, 19, 21 yaşadək futbolçuların Avropa, həmçinin dünya dempionatının seçmə mərhələ sınaqlarını idarə edib.

Nyuberqlə daha əvvəl yolu kəsişən yeganə təmsilçimiz “Qarabağ”dı. O, komandanın Konfrans Liqasının 2021/22 mövsümünün 3-cü təsnifat mərhələsində səfərdə AEL-ə (Cənubi Kipr) qarşı ilk görüşündə (1:1) iş başında olub. Ədalət təmsilçisi burda rəqibə rəsmi xəbərdarlıq etməyibsə, ağdamlılardan Maksim Medvedev, Şahruddin Məhəmmədəliyev və Patrik Andradeyə “sarı” göstərib. Hətta bu matçı sonadək idarə edə bilməyib. 80-ci dəqiqədə zədələndiyindən onu həmyerlisi Boyan Panciç əvəzləyib.

Referi karyerası ərzində 401 matç idarə edib, 1237 sarı, 49 qırmızı vərəqə göstərib.