Ölkəmizi Çempionlar Liqasında təmsil edən "Qarabağ" bu gün 3-cü təsnifat mərhələsinin cavab oyununa çıxacaq.

Bilindiyi kimi, bu matç pley-offa vəsiqə qazanmaq baxımından önəmlidi. Üstəlik komandamız ilk oyunda qələbə qazanmadığından vəziyyət çətindi. Bəs, belə vacib matçın idarəçiliyi kimə tapşırılıb? "Qarabağ"ın taleyi əmin əllərdədi?

"Football-plus.az" oyunun baş hakimi haqda ətraflı məlumatı təqdim edir.

Simone Sozza. 1987-ci ildə İtaliyanın Milan şəhərində dünyaya göz açan ədalət təmsilçisi həm də sabiq futbolçudu. Onun hakimliyə marağı gənc yaşlarında yaranıb. 36 yaşlı Sozza qısa müddətdə peşəkar səviyyəyə yüksələn azsaylı hakimlərdəndi. O, karyerasına ölkəsinin aşağı liqalarında başlayıbsa, 2020-ci ildən A seriyasına keçib. Buna qədər C seriyasının "ən yaxşı gənc hakimi" adına layiq görülən ədalət təmsilçisi 2023-cü ildə FİFA referisi dərəcəsini alıb. İndiyə qədər elita klublarının 44 matçını idarə edən Sozza burda 194 sarı, 7 qırmızı vərəqə göstərib. Simonenin beynəlxalq oyun karyerası o qədər də zəngin deyil. Amma qısa müddətə Çempionlar, Avropa, Konfrans Liqaları, həmçinin U-17 və U-19-ların Avropa çempionatının seçmə mərhələ matçlarını sığdıra bilib.

İndiyə qədər nə millilərimizlə, nə də klublarımızla yolu kəsişən ədalət təmsilçisi 255 oyun idarə edib ki, bu görüşlərdə 1032 sarı, 58 qırmızı vərəqə ilə futbolçuları üzüb.