"Qarabağ" bu gün Çempionlar Liqasının 2-ci təsnifat mərhələsində "Linkoln Red İmps"i qəbul edəcək.

Komanda məqsədə çatsa, tarixi uğurların sayı artacaq ki, bunun üçün vacib olan amillərdən biri də hakimlikdi. Söhbət ədalət təmsilçisinin dəstəyindən yox, tam ədalətli qərarlarla yadda qalıb-qalmayacağından gedir. Bəs məhz idarəçilik baxımından rahat ola bilərikmi?

"Football-plus.az"ın ənənəvi hakim təqdimatına keçid alaq.

Yakob Sandberq - 2015-ci ildən Danimarkanın 1-ci divizonunda oyunları idarə edən 34 yaşlı ədalət təmsilçisi 2019/20 mövsümündən superliqa matçlarına təyinat almağa başlayıb. Sandberq burda 51 oyun idarə edib, 211 sarı, 7 qırmızı vərəqə üçün əlini cibinə atıb. O, 2021/22 mövsümündə “ilin hakimi” seçilib. 2022-ci ildən bəri FİFA referisi statusu daşıyan Yakobun karyerası o qədər də zəngin deyil. “Fit sahibi” indiyə qədər Avropa çempionatının seçmə mərhələsində, Gənclər və Konfrans Liqasının oyunlarında meydana çıxıb. “Qarabağ”ın oyunuyla karyerasını zənginləşdirəcək hakimin şəxsi həyatı da diqqəti çəkir. Çünki o, Danimarka parlamentinin tərkibində təşkilat rəhbəridi. Əvvəllər mədəniyyət nazirinin icraçı köməkçisi də işləyib. Ümumiyyətlə, karyerası ərzində 217 matç idarə edən ədalət təmsilçisi 868 sarı, 27 qırmızı vərəqə göstərib.

KƏNAN BAHADIR