Polşada keçiriləcək Çempionlar Liqasının 2-ci təsnifat mərhələsinin "Rakuv" - "Qarabağ" oyununun təyinatları bəlli olub.

Qarşılaşma İsveçrədən olan hakimlər briqadasına tapşırılıb. FİFA referisi Lukas Fendrixə həmyerliləri Yonas Enri və Giyom Mer laynsman qismində kömək edəcək. Dördüncü hakim funksiyasını isə Lionel Çudi yerinə yetirəcək.

“Football-plus.az” olaraq sözügedən matçın əhəmiyyətini nəzərə alıb baş hakim Lukas Fendrixi araşdırdıq. Əldə etdiyimiz məlumatlara keçid alaq.

38 yaşlı FİFA referisi karyerası ərzində 328 matç idarə edib. Futbolçuları tez-tez cəzalandırmağı sevən, güzəştə getməyən ədalət təmsilçisi kimi tanınır. Xüsusilə İsveç klublarına “göz verir, işıq vermir” desək, yanılmarıq. Maraqlıdı ki, ədalət təmsilçisi ölkəsinin superliqasında idarə etdiyi 114 matçda 582 sarı, 14 qırmızı, 26 kubok oyununda 121 sarı, 4 qırmızı, 104 aşağı liqa qarşılaşmasında 531 sarı, 17 qırmızı vərəqə göstərib.

Amma referi beynəlxalq görüşlərin idarəçiliyi baxımından təcrübəli deyil. Görünür, FİFA ona o qədər də güvənmir. Ola bilsin, səbəb yuxarıda qeyd olunan statistikadı. Digər detalları araşdırarkən bəlli olur ki, hakimin qəzəbi ümumbəşərdi. O, indiyə qədər 5 dəfə Konfrans Liqası matçlarını idarə edib. Ədalət təmsilçisi həmin oyunlarda futbolçulara 31 sarı vərəqə göstərib. Beynəlxalq oyunlarda Lukasa əsasən gənclərin iştirakı ilə təşkil olunan turnirlərdə güvənilir. Hakimin Çempionlar Liqası təcrübəsi isə yoxdu. Daha dəqiq desək, Fendrix məhz “Rakuv” – “Qarabağ” matçında bu yarışda debüt edəcək. Ümid edək ki, karyerası ərzində 328 matçda cibindən 1714 vərəqə çıxaran referi “Rakuv” – “Qarabağ” oyununda ədaləti təmin edəcək. Onsuz da Azərbaycan futbolu dəfərlərlə beynəlxalq müstəvidə hakim səhvinin qurbanı olub.

Qeyd edək ki, iyulun 26-da, Çenstohova şəhəri stadionunda keçiriləcək görüş Bakı vaxtı ilə saat 22.15-də başlayacaq. Cavab matçı avqustun 2-də Bakı Olimpiya Stadionunda gerçəkləşəcək.

KƏNAN BAHADIR