“Qarabağ” bu gün Avropa Liqasının qrup mərhələsində İsveç “Həkken”iylə qarşılaşacaq.

Tofiq Bəhramov adına Respublika stadionunda keçiriləcək matç üçün təyinatlar bəllidi. FİFA referisi Yucin Cayaya Doyando Miftari və Rejdi Avdo kömək edəcək. Dördüncü hakim funksiyasını Olsion Yzeiraj yerinə yetirəcək. Bilindiyi kimi, “Qarabağ” qələbə qazansa, ölkə futbolunda sözügedən turnirin pley-offuna adlayan ilk klubumuz olacaq. Bu məqam matçın ədalətli idarə edilməsinin vacibliyini artırır. Bəs UEFA tarixi görüşü kimi əmanət edib? Qəzetimizin ənənəvi hakim təqdimatına keçid alaq.

Yucin Caya... 33 yaşlı ədalət təmsilçisi karyerasının ilk matçlarını Albaniya çempionatlarında idarə edib. O, aşağı liqada 16 oyunda meydana çıxdıqdan sonra elita klublarının görüşlərinə təyinat alıb. Burda 118 qarşılaşmada baş hakim kimi çıxış edən Caya 526 sarı, 38 qırmızı vərəqə göstərib. 2017-ci ildən etibarən beynəlxalq matçlarda iş başında olub. Yucinə Çempionlar, Avropa, Konfrans Liqası oyunlarıyla yanaşı, 17, 19, 21 yaşadək futbolçuların Avropa çempionatı sınaqlarında güvənilib. Referi cari mövsümdə Konfrans Liqasında təsnifat və qrup qarşılaşmalarına təyinat alıb. O, həmçinin AÇ-2024-ün seçmə mərhələsinin Litva - Macarıstan görüşünü idarə edib.

Ədalət təmsilçisi ilk dəfə Azərbaycan təmsilçisinin oyununu idarə edəcək. Amma ötən “futbol ili”ndə “Qarabağ”ın Bakıdakı görüşündə dördüncü hakim funksiyasını yerinə yetirib. O, “köhlən atlar”ın Avropa Liqasının qrup mərhələsinin 2-ci turunda Fransa "Nant"ına 3:0 hesabıyla qalib gəldiyi qarşılaşmada bu vəzifəni yerinə yetirib. Görəsən, Caya növbəti dəfə təmsilçimizin rəqibi darmadağın etməsinə şahidlik edə biləcəkmi?

Ümumiyyətlə, indiyə qədər 187 matç idarə edən hakim 849 sarı, 65 qırmızı vərəqə ilə yadda qalıb.

KƏNAN BAHADIR