Türkiyə çempionatında ''Qalatasaray''ın ardından ''Fənərbaxça'' da yeni mövsümə qələbə ilə başladı.

“Football-plus.az” xəbər verir ki, İstanbul nəhəngi dünən doğma fanatları önündə ''Adana Dəmirspor''u qəbul etdi. Adanalıların qapıçısı Dəniz Dönməzər superliqa tarixinə düşdü. O, 15 yaş 324 günlüyündə oynamaqla turnirin tarixində start heyətində meydana çıxan ən gənc 3-cü futbolçu oldu! Bu göstəricidə Dəniz yalnız Gürhan Gürsoy (15 yaş 249 gün) və Əmrə Dəmirdən (15 yaş 321 gün) geri qaldı. Maraqlıdı ki, ''Fənər'' elitada debüt edən 15 yaşlı qapıçıya cəmi 1 qol vura bildi. Ceko 38-ci dəqiqədə fərqlənməklə komandasına qələbə qazandırdı. Yeni transfer Alan Sent-Maksimin superliqada ilk oyundaca aktivinə məhsuldar ötürmə yazdı. Ceko əvvəlki klubu ''İnter''in heyətində A seriyasında 22 qol həddinə 69-cu oyunda çatmışdısa, superliqada eyni qol sayına 37-ci oyunda çatdı.

Onu da vurğulayaq ki, ötən mövsümü də nəzərə almaqla ''Fənər''in çempionatda məğlubiyyətsiz seriyası 28 oyuna yüksəldi. Komandanın sonuncu dəfə belə seriyası 50 il öncə - sentyabr 1973 - may 1974 aralığında baş tutmuşdu.

ƏLİ