''Fənərbaxça'' dünən Türkiyə kubokunun yarımfinal mərhələsinin cavab oyunu çərçivəsində doğma fanatları önündə ''Sivasspor''la qarşılaşdı.

Xatırladaq ki, ilk görüş qolsuz başa çatmışdı. İnamlı təsir bağışlayan İstanbul nəhəngi fasilədən sonra rəqibin müqavimətini qırmağı bacardı. Fərdi Kadıoğlu, Batşuayi və Kinqin qolları ilə 3:0 qalib gələn ''Fənər'' tarixində 18-ci dəfə bu turnirin finalına yüksəldi. ''Sarı-lacivərdlilər'' əvvəlki 17 finaldan yalnız 6-dan qələbə ilə ayrılıblar. Komanda sonuncu dəfə finalda 2018-də oynamış və ''Akhisarspor''a məğlub olmuşdu. Ümumiyyətlə, onu da vurğulayaq ki, ''Fənər'' 9 ildi titul qazanmır!

Komanda son titulunu 2014-ün avqustunda superkuboku qazanmaqla əldə edib. ''Fənərbaxça''nın finaldakı rəqibi bu gün keçiriləcək ''Ankaragücü'' - ''İstanbul BŞ'' oyunundan sonra bəlli olacaq.