İyulun 9-da avrokubokların 2024/25 mövsümünə start verildi.

Çərşənbə axşamı və çərşənbə günlərində Çempionlar Liqasının (ÇL) 1-ci təsnifat mərhələsinin ilk oyunları keçirildi.
Qeyd edək ki, son çempion “Qarabağ” ölkəmizin reytinqinə əsasən mübarizəyə 2-ci təsnifat mərhələsindən başlayacaq. Ağdamlıların potensial rəqibləri “Hamrun Spartans” və “Linkoln Red İmps” ilk matçı Maltada keçirdilər. Ta’Kali şəhərində baş tutan oyun olduqca kobud axarda keçdi.

Hakim Aleksandar Stavrev (Şimali Makedoniya) 9 dəfə sarı, 2 dəfə isə qırmızı vərəqədən istifadə etməli oldu. Maltalılardan yarımmüdafiəçi Elionay 10-cu dəqiqədə birbaşa qırmızı vərəqə aldığına, qonaqlardan isə hücumçu Enrike Qomes 45-ci dəqiqədə ikinci xəbərdarlığa görə meydandan qovuldu. “Hamrun Spartans” oyun planında üstün olsa da, Britonun 37-ci dəqiqədə vurduğu yeganə qol “Linkoln Red İmps”ə qələbə qazandırdı. Beləliklə, Cəbəllütariq çempionu bir ildən sonra yenidən Bakıya gəlməyə yaxındı.

Xatırladaq ki, “qırmızı-ağlar” ötən yay ÇL-in 1-ci təsnifat mərhələsində “Qarabağ”a evdə 1:2, səfərdə isə 0:4 hesabı ilə uduzmuşdular.

1-ci təsnifat mərhələsi, ilk oyunlar
Hamrun Spartans (Malta) - Linkoln Red İmps (Cəbəllütariq) 0:1
Brito, 37.
Panevejis (Litva) – HİK (Finlandiya) 3:0
Velyulis, 17. Qorobsov, 65-p. Mbo, 67.
Nyu Seynts (Uels) – Deçiç (Monteneqro) 3:0
Yanq, 4; 28. Deyvis, 39.
UE Santa Koloma (Andorra) – Ballkani (Kosovo) 1:2
Əl-Qazi, 22 – Emerllahu, 42-p. Karrika, 90.
Vikinqur (İslandiya) – Şemrok Rovers (İrlandiya) 0:0
Virtus (San Marino) – FKSB (Rumıniya) 1:7
Battistini, 86 - Olaru, 6; 11; 37. Popa, 22; 27. Mikulesku, 70; 73.
Ordabası (Qazaxıstan) – Petrokub (Moldova) 0:0
Flora (Estoniya) – Selye (Sloveniya) 0:5
Matko, 7. Vuklişeviç, 10. Zabukovnik, 45+1. Arons, 71. Svetlin, 90.
RFŞ (Latviya) – Larn (Şimali İrlandiya) 3:0
Kiqurs, 30. Balodis, 49. Paniç, 60.
Slovan (Slovakiya) – Struqa (Şimali Makedoniya) 4:2
Vayss, 16. Mak, 36. Kutska, 85; 90+1 - İbrahimi, 55; 74.
Klaksvik (Farer adaları) – Differdanj (Lüksemburq) 2:0
Frederiksberq, 12; 45+4-p.
Ludoqorets (Bolqarıstan) – Dinamo-Batumi (Gürcüstan) 3:1
Tekpetey, 13. Rik, 24. Vitri, 72 – Mamuçaşvili, 62.
Dinamo-Minsk (Belarus) – Pünik (Ermənistan) 0:0
Borats (Bosniya və Hersoqovina) – Eqnatiya (Albaniya) 1:0
Qrelya, 90+6.

Cavab oyunları iyulun 16-17-də keçiriləcək.