Londonda keçirilən “Böyük dəbilqə” seriyalı turnirdə daha iki mərhələ arxada qaldı.

Qadınların yarışında sensasiya yaşandı. Belə ki, favoritlər sırasında göstərilən İqa Sventek və Kori Qauff mübarizəni dayandırdı.

Kişilərin turnirində favoritlərdən biri Novak Cokoviçdi. Serbiyalı ulduz 1/16 finalda avstraliyalı Aleksey Popırinin öhdəsindən gəldi. 37 yaşlı Cokoviç Açıq erada “Böyük dəbilqə” turnirlərində 35 yaşdan sonra 50 qələbə qazanan 3-cü tennisçi oldu. Yalnız Ken Rozuoll (64) və Rocer Federer (62) həmin yaşdan sonra ondan daha çox qələbə qazanıb.

Cokoviç qələbə qazanandan sonra raketka üzərində skripka çalmağı imitasiya etdi. Dediyinə görə, bir neçə aydı skripka dərslərinə gedən qızı Tara üçün bu jestə əl atıb. Bu oyunda tennisçilər daha bir jest edib. Novak özünü elə göstərib ki, topa zərbə vurur, Popırin də cavabında topu dəf edir. Tennisçilər İngiltərə yığmasının futbol üzrə Avropa çempionatında yarımfinala çıxmasına bu yolla reaksiya verib.