43 milyon 600 min dollar mükafat fonduna malik, qrunt örtükdə keçirilən “Rolan Qarros” bazar günü başa çatdı.

"Football-plus.az" xəbər verir ki, bir gün əvvəl qadınlar arasında final oyunu keçirildi. Gözlənildiyi kimi, dünya qadın tennisinin bir nömrəsi İqa Sventek 18 yaşlı amerikalı Kori Qauff önündə çətinlik çəkmədi. Polşalı 1 saat 7 dəqiqə davam edən dueldən qalib ayrılmaqla 21-ci əsrdə ardıcıl 35-ci qələbə qazanmağı bacaran 2-ci tennisçi oldu. Ona qədər Vinus Uilyams eyni nəticəni göstərib. 21 yaşlı tennisçi 2020-də də “Rolan Qarros”un qalibi olmuşdu.

Elə kişilərin turnirində də qalib ciddi müqavimət görmədi. “Rolan Qarros”dan əvvəl Rafael Nadalın karyerasındakı son turnirə çıxdığı deyilirdi, üstəlik Parisdə onun xroniki daban zədəsi də güclənmişdi. Bununla belə, ispaniyalı əfsanə Kasper Ruudun müqavimətini qırmaqda çətinlik çəkmədi. Nadal karyerasında 14-cü dəfə “Rolan Qarros”da, ümumilikdə 22-ci dəfə “Böyük dəbilqə” turnirində qalib gəldi. 36 yaşlı tennisçi ən yaxın izləyicilərindən – Novak Cokoviçlə Rocer Federerdən iki titul uzaqlaşdı. Ümumilikdə karyerasında 92-ci titulu qazanan Nadal “Rolan Qarros” tarixinə ən yaşlı çempion kimi düşdü – 36 yaş 2 gün. Əvvəlki rekord onun həmvətəni Andres Gimenoya (34 yaş 9 ay 19 gün) məxsus idi. Ümumiyyətlə, “Böyük dəbilqə” turnirlərinin ən yaşlı qalibi isə 1972-ci ildə - 37 yaş 1 ay 24 günlüyündə “Australian Open”i qazanan avstraliyalı Ken Rozuolldu.

Ruud üzərində qələbə sayəsində 2,4 milyon dollar qazanan Nadal karyerası ərzində qazandığı mükafat məbləğinə görə Rocer Federeri arxada qoyub. İsveçrəli 130,6 milyon, ispaniyalı isə 130,7 milyon dollar qazanıb. Bu göstəricidə 156,1 milyon dollarla 1/4 finalda məhz Nadala uduzan Novak Cokoviç liderlik edir. 4-cü yerdə isə Endi Marrey qərarlaşıb (62,7 milyon dollar).