Musson da “Florida”ya mane olmadı
Dünən Stenli kuboku uğrunda seriyada 3-cü oyun keçirildi.
“Football-plus.az” xəbər verir ki, “Edmonton”un qonağı olan “Florida” ardıcıl 3-cü qələbə ilə, demək olar ki, işi bitirdi. Seriyanın 4-cü oyunu iyunun 16-da keçiriləcək. Hərçənd son iki gündə Cənubi Floridanı ağuşuna alan musson fırtınası “Panters”in Edmontona səfərinə yetərincə mane oldu. Komanda Kanadaya 3 saat 25 dəqiqə gecikmə ilə uçdu, konkret Edmontona oyuna 22 saat qalmış çatdı. Göründüyü kimi, bu məqam da “Florida”nın qələbəsini əngəlləmədi.
Beləliklə, “Florida” tarixində ilk dəfə Stenli kubokunu qazanmağın astanasındadı. MHL tarixində 29-cu dəfə hansısa komanda final seriyasında 3:0 önə çıxıb. Maraqlıdı ki, əvvəlki 28 halın yalnız birində 3:0 öndə olan komanda sonda qələbəni əldən verib. Xatırladaq ki, Stenli kubokunun son qalibi “Veqas”dı. “Zadəganlar” ötən mövsüm finalda məhz “Florida”nı məğlub etmişdi.
Düzdü, dünənki oyunda 4:1-dən sonra iki qol vurmaqla fərqi minimuma endirmələri “neftçilər”i bir qədər ümidləndirib. Məsələn, onların baş məşqçisi Kris Noblox belə deyib:
“Düşünürəm ki, biz bu komandanı məğlub edə biləcəyimizi göstərdik”.
“Edmonton”un qapıçısı Stüart Skinner isə baş məşqçisindən də inamlı danışıb:
“Statistika ilə o qədər də yaxından tanış deyiləm. Ancaq bunu bacara biləsi bir komanda varsa, o da “Edmonton”du”.
“Edmonton”un kapitanı Konnor Makdevid də komandanın indiki durumu haqda danışıb:
“Dördüncü oyuna daha yaxşı hazırlaşmaq və qalib gəlmək lazımdı. İndi edə biləcəyimiz yalnız budu. Finalın ilk üç oyununda qalib gələ bilmədik. Həm yaxşı, həm də pis keçirdiyimiz periodlar oldu. Odu ki, qələbə yolunu tapmağa çalışırıq”.
“Neftçilər”in əsas ulduzlarından biri Leon Drayzaytlın “Florida” önündəki ardıcıl üçüncü məğlubiyyətlə bağlı fikirləri:
“Çoxlu zərbə vursaq da, sadəcə, bunlar qola çevrilmir. Demək olar ki, bu gün özümüz öz ayağımıza güllə sıxdıq. Bir neçə fərdi və kollektiv səhvə yol verdik, rəqib də dərhal bundan yararlandı”.
Hər halda, daha bir statistik məqam “Edmonton”a yaxşı heç nə vəd etmir. İş ondadı ki, Kanada klubları 1993-cü ildən bəri Stenli kubokunu qazana bilmir.
Edmonton – Florida 3:4 (0:1, 1:3, 2:0)
Seriyada hesab – 0:3.
Digər xəbərlər
