''Fənərbaxça'' yeni baş məşqçisi Joze Mourinyonun transfer tələblərini yerinə yetirmək üçün bir çox legionerlərlə yollarını ayırmaq məcburiyyətindədi.

“Football-plus.az” xəbər verir ki, çünki yeni mövsümdə Türkiyə çempionatında legioner limiti 14-dən 12-yə düşürülərək bir qədər də sərtləşdiriləcək. Düzdü, Coşua Kinq və Leonardo Bonuççinin ayrılması ilə hazırda komandada əcnəbilərin sayı 16-dan 14-ə enib. Amma daha 4 legionerin başqa klublarda icarədə olduğunu xatırladaq. Joao Pedro, Jin Ho Jo, Omar Fayed və Migel Kresponun qayıdışı ilə legionerlərin sayı 18-ə yüksələcək. Ona görə də rəhbərlik onlardan bəziləri ilə yolları ayırmağın planlarını cızır. Bu 18 futbolçudan ən azı 10-u ilə yolların ayrılacağı gözlənilir. Bura ilk növbədə Luan Peres, Omar Fayed, Joao Pedro, Migel Krespo, Rayan Kent və Miha Zayts daxildi. Türkiyə mətbuatının yazdığına inansaq, artıq Zayts komanda yoldaşları ilə vidalaşıb. Sloveniyalı futbolçu özünə yeni klub axtarır. 2019-un yanvarında ''Empoli''dən 3,5 milyon avroya transfer edilən, 2020/21-də ''Cenoa''ya icarəyə verilən 28 yaşlı futbolçunun ''Fənər''lə 2026-ya qədər müqaviləsi var. Onun satışından müəyyən məbləğ qazanılacağı gözlənilir. Bundan başqa Pedroya da özünə yeni klub tapmaq məsləhət görülüb. Rəhbərlik onunla müqaviləni qarşılıqlı şəkildə pozmağa hazırdı. Bu arada Rade Kruniçlə bağlı da yeni xəbər var. ''Fənər'' təcrübəli bosniyalı yarımmüdafiəçini ötən mövsümün qış fasiləsində ''Milan''dan icarəyə götürmüşdü. Kruniç bu 5-6 ay ərzində ondan gözlənilənləri verə bilmədi. Amma müqavilədə ''məcburi transfer'' maddəsi olduğu üçün ''Fənər'' ''Milan''a 3,5 milyon avro ödəyərək onu daimi əsasda heyətinə qatmalı olub. 30 yaşlı futbolçu ilə üçillik müqavilə imzalanıb. Müqavilə iyulun 1-dən qüvvəyə minəcək. Kruniç indiyə qədər ''Fənər''də 18 rəsmi oyuna çıxaraq 1 məhsuldar ötürmə ilə fərqlənib.

ƏLİ