Heyətini legionerlərlə doldurandan sonra “Fənərbaxça” baş məşqçi İsmayıl Kartalın planlarına daxil olmayan əcnəbilərlə yollarını ayırmağa başlayıb.

"Football-plus.az" xəbər verir ki, üç futbolçunun – Joao Pedro, Qustavo Enrike və Dieqo Rossinin yeni mövsümdə heyətdə olmayacağını indidən əminliklə söyləmək olar.

“Qremio” ilə anlaşan Pedro rəhbərliyin icazəsi ilə keçidin son detallarını həll etmək üçün Braziliyaya yollanıb. Türkiyə mətbuatının yazdığına inansaq, İstanbul nəhəngi bu satışdan 3,5 milyon avro qazanacaq. Xatırladaq ki, 31 yaşlı braziliyaəsilli italiyalı forvard ötən yay 4,6 milyon avroya “Kalyari”dən transfer olunmuşdu. Amma zədə və uyğunlaşma problemi ilə üzləşən təcrübəli futbolçu ümidləri doğrulda bilməyərək mövsümü yalnız 28 oyun, 5 qol, 1 məhsuldar ötürmə göstəriciləri ilə tamamladı. Mərkəz müdafiəçisi olan Qustavo Enrike isə ötən yay Jorje Jezuşun istəyi ilə “Flamenqo”dan 1,4 milyon avroya birilliyə icarəyə götürülmüşdü. “Fənər”in onu daha 1,4 milyon avro ödəyərək daimi əsasda transfer etmək hüququ var idi. Amma rəhbərlik bu maddədən yararlanmaq istəmədi. Çünki 30 yaşlı oyunçu o qədər də etibarlı təsir bağışlamayaraq hələ ilk dövrənin gedişində gözdən düşdü. Yalnız 14 rəsmi oyuna çıxan və 2 qol vuran Enrike vətəninə qayıdıb. Onun Enner Valensiyanın da şərəfini qoruduğu “İnternasyonal”a keçəcəyi gözlənilir. Dieqo Rossiyə gəlincə, onun “Fənərbaxça” karyerasının çox da bərbad alındığını söyləmək olmaz.

Amma İstanbul nəhəngi 2021-in yayında 5,5 milyon avroya “Los Anceles”dən transfer edilən uruqvaylı vingerdən daha yaxşı performans gözləyirdi. Rossi bu iki il ərzində heç cür əsas heyətin daimi üzvünə çevrilə bilmədi. 25 yaşlı futbolçu “sarı-lacivərdlilər”də 90 rəsmi oyunda forma geyərək 10 qol, 20 məhsuldar ötürməlik performans ortaya qoydu. Rossinin ABŞ-a qayıdacağı gözlənilir. Amma onun “Fənər”lə 2025-ə qədər müqaviləsi var. ABŞ mətbuatının yazdığına inansaq, Rossi 200 min dollar qarşılığında MLS təmsilçisi “Atlanta Yunayted”ə icarəyə veriləcək. Bu oyunçularla birlikdə bu yay “Fənərbaxça”dan ayrılan futbolçuların sayı 12-yə çatacaq. İstanbul nəhəngi daha öncə Arda Gülər, Salai, Bruma, Berişa, Valensiya, Pelkas, Samatta və qapıçı Ərtuğrul Çətinlə vidalaşmışdı. Gənc oyunçu Tyaqo Çukur isə Belçika təmsilçisi “Beveren”ə icarəyə verilib.