''Fənərbaxça'' Türkiyədə transfer pəncərəsinin bağlandığı son gündə 4 gənc oyunçu ilə vidalaşdı.

"Football-plus.az" xəbər verir ki, Jin Ho Jo və Omar Fayed Serbiya təmsilçisi ''Novi Pazar''a birillik icarəyə verildi.

20 yaşlı koreyalı Jin Ho Jo ''Fənər''ə ötən ilin martında gəlmişdi. Klubla 2026-ya qədər müqaviləsi olan koreyalı ötən mövsüm U-19 komandasında forma geymişdi. 20 yaşlı misirli Fayed isə təxminən bir ay öncə transfer edilmiş və onunla dördillik müqavilə imzalanmışdı.

Bundan başqa ''Fənər''in ötən mövsümün qış fasiləsində ''Barselona''dan heyətinə qataraq ''Samsunspor''a yarım illiyə icarəyə verdiyi Əmrə Dəmir yenə icarəyə göndərilib. Cari mövsümü o, 1-ci liqa təmsilçisi ''Ümraniyəspor''da keçirəcək. İstanbul nəhəngində heç cür özünü göstərə bilməyən 23 yaşlı vinger Burak Kapacak isə ''Sivasspor''a birillik icarəyə verilib.

Onu da bildirək ki, hazırda 16 legioneri olan ''Fənərbaxça'' 14-ə bərabər olan legioner limiti tələbini qarşılamaq üçün 2 əcnəbi oyunçunun müqaviləsini qış fasiləsinə qədər donduracaq. Söhbət Luan Peres ilə Linkoln Enrikedən gedir. Peres zatən zədəlidi və önümüzdəki günlərdə əməliyyat olunacaq. Martda diz bağları qopan və uzun müddətə sıradan çıxan Linkoln Enrike isə artıq fərdi məşqlərə başlayıb. Amma o, bu ilin sonuna qədər oynaya bilməyəcək.

ƏLİ