Cokoviç niyə tarixin ən yaxşı tennisçisinin adını çəkmədi?
Serbiyalı tennisçi Novak Cokoviç tarixin ən dahi oyunçusunun adını məhz bütün çempionlara hörmət göstəridiyinə görə açıqlamaq istəmədiyini deyib.
36 yaşlı tennisçi “Böyük dəbilqə” turnirlərində qələbə sayına (24) görə kişi tennisçilər arasında rekordçudu. Onun hesabında ümumilikdə 99 ATP (98-i fərdi hesabda) titulu var:
“Belə diskussiya aparmaq mənim üçün çox çətindi. Ancaq düşünürəm ki, söhbət tennisdən gedəndə adamların bu haqda danışıqlarından müsbət emosiyalar alıram. Axı nə qədər çox adam bu mövzuda mübahisə edirsə, bizim idman növü haqda söhbətlərin sayı bir o qədər artır. Bu isə tennisə yalnız fayda verir. Ancaq mən heç vaxt tennisdə kimi ən böyük saydığımı deməyəcəm. Bu işi başqalarına buraxıram. Bu mövqeyim əsasən onunla bağlıdı ki, bütün nəsillərdən olan böyük çempionların hamısına hörmət edirəm”.
Halbuki Cokoviç əvvəllər dəfələrlə Rafael Nadalın karyerasındakı ən böyük rəqibi olduğunu deyib. 37 yaşlı ispaniyalı karyerası boyunca 22 “Böyük dəbilqə” titulu qazanıb. Yeri gəlmişkən, Nadalın builki “Rolan Qarros”da iştirak ehtimalı böyükdü. Bu haqda xəbəri “Diario AS” yayıb. Dünyanın sabiq bir nömrəli raketkası gələn həftə qrunt örtükdə məşqlərə başlamaq üçün Fransaya yollanacaq.
Amma 37 yaşlı Nadal Romada keçirilən “Masters” seriyalı turnirin 2-ci dövrəsində polşalı Xubert Xurkaça uduzandan sonra “Rolan Qarros”da iştirak edə biləcəyinə şübhə ilə yanaşmışdı. “Böyük dəbilqə” seriyalı turnir mayın 26-sı – iyunun 9-u aralığında Fransada keçiriləcək. Onun son qalibi Cokoviçdi.
Digər xəbərlər
