Misli premyer-liqasına bu mövsüm qoşulan, ilk dövrələrdə yaxşı təsir bağışlayan “Araz-Naxçıvan”ın indiki durumu maraq doğurur.

Belə ki, Muxtar Respublika təmsilçisi mövsümün əvvəlində, yəni 1-ci dövrədə “Qarabağ”, “Neftçi” kimi çempionluğa namizəd göstərilən komandalara qalib gəlməyi bacarmışdı. 2-ci dövrədə də qənaətbəxş oyun sərgiləyən komanda liderlər siyahısından geri düşsə də, ən azı “avrokubok zonası” və ölkə kuboku uğrunda mübarizəsini davam etdirirdi. Lakin 3-cü dövrədə gözləntilər doğrulmadı. Artıq çempionatda 4-cü, yəni sonuncu dövrədi. “Ağ-qırmızılar”ı qarşıda 8 oyun gözləyir ki, bu da öz növbəsində komandanın həm liderlər sırasına yüksəltməsinə, həm də elitadan getməsinə yardım edəcək qədər yetərlidi.

Baş məşqçi Azər Bağırovla söhbətləşdik. Görəsən, təcrübəli mütəxəssis mövsümün əvvəliylə müqayisədə komandasının indiki durumunu necə qiymətləndirir? Yəni ilk dövrədə liderlər sırasında olan həmin “Araz-Naxçıvan”ı görə bilməməyizin səbəbi nədi? Azər bəy məsələyə belə aydınlıq gətirdi.

- Mövsümün ilk yarısında olduğu kimi, qış fasiləsindən sonra da yaxşı start verdik. Sadəcə, iki cəbhədə mübarizədə aparmağın bizim üçün çətin olduğunu hiss etdik. Çünki ehtiyat oyunçularımız azdı. Hələ ki iki cəbhədə mübarizə aparmaq “Araz-Naxçıvan” üçün deyil. Çünki yay fasiləsində belə istədiyimiz futbolçuları komandaya cəlb edə bilmədik. Amma buna bir sıra səbəbləri göstərərdim. Əsas səbəb iki cəbhədə oynaya bilməməyimiz və 3-4-cü dövrələrdə bizə qarşı çox kobud hakim səhvlərinin olmasıdı. Həmin səhvlər üzündən 10-12 xal itirmişik.

- Ayrı-ayrı futbolçuların formadan düşdüyü də hiss olunur. Siz də belə düşünürsüz?
- Əslində bu, normal haldı. Sadəcə, bəzi komandalar bunu daha tez aradan qaldıra bilir. Çünki ehtiyat oyunçular skamyası daha genişdi. Biz isə bu yöndə kasadlıq çəkirik. Həm də heyətdəkilərin bir çoxu premyer-liqa təcrübəsi olmayan futbolçulardı. Əsasən də yerli oyunçularımız burda çoxluq təşkil edir. Bu da sonda eniş yaşayan oyunçular üzərində təzyiqə səbəb olur. Həmin təzyiqi aradan qaldırmaq daha çətindi.

- Rəqiblərinizin getdikcə oyunlarınızı təhlil edib öyrənməsini, əks-təsir üsullarını tapmasını da komandanın problemlərindən biri kimi göstərmək olarmı?
- Deməzdim ki, bu, təhlil məsələsidi. Əslində bizim oyunlarda çoxlu qol imkanımız olur. Sadəcə, həmin imkanlardan yararlana bilməmək bizi çətin duruma salıb. Məsələn, elə qarşılaşmalar var ki, birinci hissədə 4-5 yüzfaizlik qol imkanımız olub, amma bunların heç birini dəyərləndirə bilməmişik. Rəqib isə yeganə qol imkanından yararlanıb. Hətta adicə standart vəziyyətdən fərqlənməyi bacarıb. Bununla da oyunu ya bərabərliyə, ya da qələbəyə aparıblar. Hesab edirəm ki, əsas problemlərimiz burdadı. İmkanlar yaradırıq, ancaq dəyərləndirə bilmirik.

- Bəs klubun maliyyəşəməsində problemlər varmı?
- Maliyyə baxımından problem olduğunu deməzdim. Çünki AFFA-dan ayrılan vəsaitlə birgə hər şey normal qaydada verilir.

- Komandanın ev oyunlarını Naxçıvandan kənarda keçirməsinin nəticələrə təsiri varmı?
- Əlbəttə, ev oyunlarını Naxçıvanda keçirsəydik, indiki xallarımızın üzərinə ən azı 10-12 xal əlavə edərdik. Eyni qaydada liderlər cərgəsində olardıq. Yəni komandanın ev görüşlərini Naxçıvanda keçirməsi daha yaxşı olardı.

- Kəsəsi, belə demək mümkündüsə, mövsümün əvvəlində avrokuboklar uğrunda mübarizə aparan “Araz-Naxçıvan”ı indi elitada qalmaq uğrunda mübarizə aparan “Araz-Naxçıvan” əvəzləyib. Belə yanaşmayla razısızmı?
- Xeyr, əsla razı deyiləm. Bu gün “Araz-Naxçıvan” bütün komandalara qarşı yaxşı futbol sərgiləyir. Yəni təkcə elitada qalmaq xətrinə deyil. Baxımlı futbol oynayırıq, qol vəziyyətləri yaradırıq, mübarizə əzmimizi ortaya qoyuruq. Sadəcə, son dönəmlərdə bizdən də asılı olmayan bəzi proseslər baş verir və həmin proseslərin də mərkəzində bizik. Bayaq dediyim kimi, çox oyun vurğulaya bilərdim ki, kobud hakim səhvləri ilə üzləşmişik, həmin səhvlər başqa komandalara qarşı olmur.

- Hər halda, klub rəhbərliyi bu gün də sizə dəstək verir, çox güvənir. Bu amil sizi necə ruhlandırır? Yəni sizi yeni Qurban Qurbanov olmağa həvəsləndirirmi?
- Gənc məşqçi kimi bəzən səhvlərimiz olur. Buna baxmayaraq, şükürlər olsun ki, rəhbərliyin bizə böyük dəstəyi var və həqiqətən də, bunu hiss edirik. Elə sizin vasitənizlə də bir daha təşəkkürümü bildirmək istəyirəm. Qurban müəllim Azərbaycan futbolu üçün bir dəyərdi, böyük qardaşımızdı. İllərlə onun və komandasının uğurlarına sevinmişik. İnşallah, qismət olarsa və bizə də şans verilərsə, Azərbaycan futboluna töhfə vermək istəyərdik.

KAMAL SƏFƏR