Misli premyer-liqasında 3-cü dövrə geridə qaldı. 19-27-ci turlarda keçirilən oyunlar bir çox məsələyə aydınlıq gətirdi. Sevindirici məqam gərginliyin artan xətt üzrə inkişaf etməsi oldusa, eniş yaşayan komandalar azarkeşlərini üzdü.

"Football-plus.az" son 9 turun mənzərəsinə nəzər salır.

"Qarabağ" sonuncu dəfə 11-ci turda "Araz-Naxçıvan"a uduzub və artıq 16 oyunluq məğlubiyyətsizlik seriyası var. Qısası, Qurban Qurbanovun komandası rəqib tanımır. "Köhlən atlar" premyer-liqadakı uğurlarıyla yanaşı, Avropa Liqasının 1/8 finalı yüksəlməklə ölkənin futbol tarixində ilkə imza atdı. Həmçinin ağdamlılar ölkə kuboku uğrunda mübarizəni də davam etdirir.

"Sabah" 3-cü dövrədə ötən "futbol ili"ndəki əzəmətini geri qaytarmaq yönündə böyük addım atdı. 3-cü dövrədə "Qarabağ"dan xal alan yeganə komanda məhz "Sabah"dı (22-ci tur: "Qarabağ" - "Sabah" 3:3). Krinoslav Renduliçin gəlişiylə 2-ci yerə iddiasını ortaya qoyan Masazır təmsilçisi 9 turun nəticələrinə əsasən həmin sıradadı. İndi komanda tempi qorumalıdı ki, bu da asan olmayacaq.

"Neftçi" 3-cü pillədə olsa da, nəticələri qaneedici deyil. Komandanın gümüş medalları çoxdan təmin etməli olduğunu düşünən azarkeşlər narazıdı. "Ağ-qaralar" 3-cü dövrədə ən böyük və sadiq fanklubu "Forza Neftçi"ni də itirdi. Bu komandanın həm oyun, həm də nəticə baxımından problemləri var. Qısası, Bojoviç Mutuya rəhmət oxutdurur.

"Zirə" ilk "dördlük"dədi. Baxmayaraq ki, son 9 oyunda 17 xal itirib. Düzü, Rəşad Sadıqovun yetirmələri mövsümün əvvəlindən bəri eyni iş prinsipinə sadiqdi. Qəsəbə təmsilçisi sırf nəticəyə hesablanmış oyunla avrokuboklar uğrunda mübarizədə iddiasını qoruyur. Lakin 4-cü dövrənin daha çətin keçəcəyini nəzərə alsaq, xal ehtiyatının nə dərəcədə artacağı sual altındadı.

"Sumqayıt" da müəyyən mənada eniş yaşadı. Bəli, hələ ki şans var. Sadəcə, daha yaxşı hazırlaşıb son 9 oyunun zərərini kompensasiya etmək lazımdı. Ən azı Samir Abasov turnir cədvəlindəki sıralamanın aldadıcı olduğunu dərk edir. Axı komandalar arasında xal fərqi çox deyil. "Kimyaçılar" avrokuboklar uğrunda mübarizədən qopmaq istəmirsə, təcili tədbirlər görülməlidi.

"Səbail" ortabab oyun tərzi və nəticələr ilə yadda qaldı. Şahin Diniyev hər dəfə "düzgün yoldayıq" deyir. Əlbəttə, bir bildiyi var, amma 3-cü dövrəni planlaşdırdığı kimi keçirmədiyini etiraf etməlidi.

“Kəpəz”lə “Turan Tovuz” son 9 oyunda yaxşı siqnallar ötürdü. 3-cü dövrədə 13 xal heç də pis nəticə deyil. Gəncəlilər faktiki elitada yerini təmin etdi. Bəs “Turan Tovuz”? Belə davam edəcəkmi? Bu, Ayxan Abbasovdan və komandasından asılıdı. Reallıq odu ki, "bozqurdlar" çətin işin öhdəsindən gəlsə, avrokuboklar uğrunda mübarizədə "mən də varam" deyəcək.

"Araz-Naxçıvan"ın durumunu eniş yox, çöküş sözüylə xarakterizə etmək lazımdı. Həm də hər mənada... Debütant nə istənilən qədər qol vura bildi, nə də qapısını yaxşı qorudu. Təbii ki, zəif oyun nəticədə əksini tapdı Azər Bağırov hadisələrin axarına müdaxilə etməsə, autsayder mövqeyiylə barışmalı olacaq.

Nəhayət, "Qəbələ"nin ümidləri tükənir... "Qırmızı-qaralar" 3-cü dövrədə qələbə qazana bilmədi. Qısası, Kaxaber Sxadadzenin gəlişi hələ ki bəhrə verməyib. Halbuki komanda 2-ci dövrəyə "Sabah"ı məğlub etməklə (1:0) yekun vuranda azarkeşlər ümidlənmişdi...

Bizi çox həyəcanlı və maraqlı 4-cü, yəni sonuncu dövrə gözləyir. Çempion bəlli olsa da, gümüş və bürünc medalların sahibləri, avrokuboklara yollanacaq komandalar bəlli deyil. Odu ki, izləməyə davam! Sonda sizi 3-cü dövrədə qeydə alınan nəticələrə əsasən tərtib olunan turnir cədvəliylə tanış edirik.

1. Qarabağ 9 8 1 0 26-9 25
2. Sabah 9 5 3 1 14-10 18
3. Kəpəz 9 4 1 4 18-18 13
4. Turan Tovuz 9 3 4 2 12-10 13
5. Neftçi 9 3 3 3 13-12 12
6. Sumqayıt 9 3 3 3 7-9 12
7. Səbail 9 3 2 4 13-14 11
8. Zirə 9 2 4 3 8-8 10
9. Araz-Naxçıvan 9 1 3 5 7-17 6
10. Qəbələ 9 0 2 7 8-19 2

KƏNAN BAHADIR