Söhbət elita təmsilçisi “Araz-Naxçıvan”dan gedir.

Mövsümə yaxşı başlayan Azər Bağırovun yetirmələri sabit çıxışı davam etdirə bilmədi. Birinci dövrənin sonlarına yaxın liderlər qrupunda yer alan komanda indi 6-cı pillədə qərarlaşıb, getdikcə də zirzəmiyə yuvarlanır. Misli premyer-liqasındakı sonuncu qələbəsi 17-ci tura təsadüf edən (“Sabah” - 2:0) naxçıvanlılar artıq 4 turdu qələbəyə həsrətdi. Sonuncu turda da “Kəpəz”ə (3:1) məğlubiyyət klubun düşdüyü bataqlıqdan çıxa bilmədiyini göstərir. Doğrudu, “Araz-Naxçıvan” bir sıra çətinliklərlə üz-üzədi. Bunlardan elə ən başlıcası azarkeş dəstəyindən mərhum olmaqdı. Amma guya mövsümün əvvəlində bu dəstək var idi? Əsas oyunçuların zədələnməsi dəlilinə gəlincə, heyətdə kifayət qədər keyfiyyətli futbolçu var. Baş məşqçi “keyfiyyətli oyunçumuz azdı” deyirsə, bəs nəyə görə faydasız futbolçuları transfer edərək bir ətək pul xərcləyiblər? Bağırovun sonuncu məğlubiyyəti yorğunluqla əlaqələndirməsi isə absurdum zirvəsidi. 2024-cü ildə keçirdikləri matçların qrafikinə diqqət yetirsək, bütün komandalar kimi oyunlar arasında ən azı 3 gün vaxtın olduğunu görərik. Başqa klublarda belə deyil? Hər nə qədər problemlər, çatışmazlıqlar olsa da, komandanın 3-cü dövrədə yalnız 1 xal toplaya bilməsi heç bir bəhanəyə əsas vermir. Görəsən, klub idarəçiləri, rəhbərlik hadisələrin belə axarının hansı sonluqla nəticələnəcəyinin fərqindədimi? Bu gedişlə premyer-liqada növbəti baş məşqçi istefası qaçılmazdı…

KAMAL SƏFƏR