Kriştiano Ronaldo böyük ehtimalla bu mövsüm də Səudiyyə Ərəbistanı çempionluğunu qazana bilməyəcək. Çünki onun şərəfini qoruduğu “Əl-Nəssr” inanılmaz qələbə seriyası yaxalayan və adını futbol tarixinə yazdıran “Əl-Hilal”dan çox geridədi. Amma fərdi planda Ronaldo üçün mövsüm çox uğurlu keçir.

"Football-plus.az" xəbər verir ki, zatən karyerasının hər dönəmində inanılmaz məhsuldarlıq sərgiləyən portuqaliyalı superulduz hətta 39 yaşında da “torba-torba” qol vurmaqda davam edir.

“Əl-Nəssr” martın 30-da 25-ci tur çərçivəsində öz meydanında “Əl-Tai”ni 5:1 hesabıyla darmadağın edərkən Kriştiano ikinci hissədə 3 qol vurmaqla diqqəti çəkmişdi. Bu turnirdə mart ayının ən yaxşısı seçilən məşhur qoleador aprelə də inanılmaz start verib. Srağagün 26-cı tur çərçivəsində “Əl-Nəssr” “Abha”nın qonağı oldu. Bu klub elitada qalmaq uğrunda mübarizə aparsa da, heyətində təcrübəli qapıçı Tataruşanu, eləcə də Tisseran, Krıxovyak, Kamano kimi Avropada tanınmış futbolçular top qovur. Amma Ronaldo bu komandanı? demək olar, təkbaşına parçaladı. Özü də bir hissəyə! O, əvvəlcə 11 və 21-ci dəqiqələrdə cərimə zərbəsindən iki qol vurdu. Halbuki Ronaldo Avropadakı karyerasının son illərində cərimə zərbələrini “dağa-daşa” vurduğu üçün tez-tez məzə obyektinə çevrilirdi.

Maraq üçün bildirək ki, onun cərimə zərbəsindən iki qol vurduğu sonuncu oyunun üstündən az qala 13 il ötüb. Ronaldo sonuncu dəfə bunu 2011-in mayında “Real”ın heyətində “Valyadolid”lə oyunda bacarmışdı. O, karyerası ərzində cərimə zərbələrindən vurduğu qolların sayını 63-ə çatdırsa da, hələ də Lionel Messidən (65) geridədi. Bununla kifayətlənməyən “Qızıl top”un beşqat qalibi fasiləyə qədər aşırma zərbə ilə daha bir baxımlı qol vurdu, üstəlik hesabına iki məhsuldar ötürmə yazdı. Düzdü, onun Maneyə ötürməsi zamanı qapıçı bir balaca topa toxunduğundan bəzi mənbələrdə onun göstəricisi “3+1” kimi qeyd olunub. Amma Avropanın aparıcı mənbələri Ronaldonun bir hissədə 5 qolda yaxından iştirak etdiyini vurğulayıblar. Fasilədə o, əvəzlənsə də, “Əl-Nəssr” daha 3 qol vuraraq 8:0 hesablı möhtəşəm qələbə qazandı. Bu, klubun rəsmi oyunlarda ən böyük qələbəsi kimi tarixə düşdü. Ronaldonun ardıcıl 2 oyunda het-trik etməsinə sonuncu dəfə 2015-ci ildə rast gəlinmişdi. Həmin vaxt o, “Real”ın heyətində sentyabrın 12-də “Espanyol”la La Liqa oyununda 5, sentyabrın 15-də isə “Şaxtyor”la ÇL matçında 3 qol vurmuşdu. Onu da bildirək ki, ulduz futbolçu karyerası ərzində 65-ci het-trikini rəsmiləşdirdi və bu göstəricidə XXI əsrdə hamıdan öndədi. Messinin aktivində 57 het-trik var. Bu mövsüm Ronaldo Səudiyyə Ərəbistanı çempionatında 24 oyuna 29 qol vurub və ən yaxın rəqibini 7 top qabaqlamaqla inamla bombardirlər yarışına başçılıq edir.

Sonda Ronaldonun indiyə qədər “Əl-Nəssr”də 60 rəsmi oyunda 56 qol, 14 məhsuldar ötürməlik mükəmməl performans sərgilədiyini də əlavə edək.