Luis Rubialesin başı dərddən qurtulmur. İspaniya Kral Futbol Federasiyasının (İKFF) sabiq prezidentinin yeni problemi ortaya çıxıb.

"Football-plus.az" xəbər verir ki, Rubiales Dominika Respublikasından gəldiyi İspaniya paytaxtı Madriddəki hava limanında saxlanılıb. O, korrupsiyada şübhəli bilinir. Yerli mənbələrə görə, sabiq prezident hüquq-mühafizə orqanlarının apardığı istintaq prosesi ilə əməkdaşlıq etməyə hazır olduğunu bildirib. Rubialesin bu məsələyə görə vətəninə bir qədər tez qayıtdığı da qeyd edilib. Yeri gəlmişkən, bir neçə gün əvvəl onun evində və Dominika Respublikasında müvəqqəti yaşadığı mənzildə axtarış aparılmışdı. İKFF-nin sabiq rəhbəri artıq ifadə verəndən sonra hava limanında sərbəst buraxılıb.

Əlbəttə, Rubialeslə bağlı bu da vurğulanmalıdı. Bir müddət əvvəl İspaniya prokurorluğu Luis Rubialesin həbsinə order verib. FİFA isə onu 3 il müddətində futboldan kənarlaşdırıb. Bu qərarların verilməsinin səbəbi çoxlarına məlumdu. “Çirkli pulların yuyulmasında iştirak”da şübhəli bilinən Rubialesin qadınlardan ibarət İspaniya yığmasının oyunçusu Cennifer Ermosonun dodaqlarından öpməsi İspaniyada böyük ajiotaj doğurmuşdu. Xatırladaq ki, o, milli komadanın DÇ-2023-ün finalında İngiltərəni məğlub etdiyi oyundan sonra mükafatlandırma mərasimi zamanı etdiyi bu hərəkətinə görə ölkə ictimaiyyətinin kəskin narazılığı ilə üzləşmiş və istefaya yollanmışdı. Yerli prokurorluq indi İKFF-nin sabiq rəhbərinin 2,5 il müddətinə həbs olunmasını istəyir.