İspaniya Futbol Federasiyasının (İFF) prezidenti Luis Rubiales hazırda dünya futbolunda ən çox müzakirə olunan şəxslərdən biridi.

"Football-plus.az" xəbər verir ki, onun iştirakı ilə bağlı yaşanmış qalmaqal artıq inanılmaz səviyyəyə çatıb. Xatırladaq ki, söhbət Rubialesin İspaniyanın xanımlardan ibarət yığma komandasının üzvü Cennifer Ermosonu öpməsindən gedir. İspaniyalı xanımlar dünya çempionu olduqdan sonra Rubiales mükafatlandırma mərasimi zamanı Ermosonu dodaqlarından öpmüşdü. Böyük təzyiqlərdən sonra Rubialesin istefa verəcəyi gözlənilsə də, o, bunu etmədi. 46 yaşlı funksionerin bu addımından sonra vəziyyət daha da pisləşdi. 23-ü yığma üzvü daxil olmaqla ümumilikdə 90 ispaniyalı qadın futbolçu yığmanı boykot edərək Rubiales bu vəzifədə olduğu müddətdə komandaya gəlməyəcəklərini açıqladılar. Maraqlıdı ki, ''Betis''in təcrübəli forvardı Borxa İqlesias da xanımlara dəstək verərək Rubialesin istefasına qədər yığmada oynamayacağını bildirdi. Bundan başqa İspaniyanın qadınlardan ibarət komandasının məşqçilər korpusunda baş məşqçi Xorxe Vilda istisna olmaqla hamı istefa verdi. Bu arada dünən FİFA-nın da bu məsələyə qarışdığı bəlli oldu. Qurumun İntizam Komitəsi hadisə ilə bağlı araşdırmaya start verib. Hələlik isə FİFA 90 gün ərzində Rubialesi futboldan kənarlaşdırıb! Bu qərar həm daxili, həm də beynəlxalq turnirlərə aiddi. Eyni zamanda Rubialesə və İFF-yə Ermoso, eləcə də onun yaxınları ilə əlaqə qurmağa qadağa qoyulub. FİFA yekun qərarını verməyənə qədər bu qadağalar qüvvədə olacaq.