İspaniya Milli Məhkəməsi (İMM) ölkə prokukorluğunun Luis Rubialesin əleyhinə olan müraciətinə baxıb. Artıq məlum qalmaqalla bağlı ilkin qərar da verilib.

"Football-plus.az" xəbər verir ki, İspaniya Futbol Federasiyasının (İFF) sabiq prezidenti avqustun 19-da qadınlar arasında dünya çempionatında çempion olan ölkə yığmasının mükafatlandırılma mərasimində Cennifer Ermosonun dodaqlarından öpdüyü üçün vəzifəsini tərk etməli olmuşdu. Ölkə ictimaiyyətinin böyük tənqidləri ilə üzləşən funksioner təzyiqə tab gətirməyərək istefaya yollanmışdı.

Ermosoya qarşı seksual təcavüz maddəsi ilə ittiham olunan Rubiales cümə günü keçirilən məhkəmədə ilk dəfə ifadə verib. İMM ilkin olaraq İFF-nin sabiq rəhbərinə Ermosoya yaxınlaşmağı qadağan edib. O, milli futbolçu ilə arasında azı 200 metr məsafə saxlamalıdı. Rubiales məhkəmə prosesi boyunca Cennifer ilə hər hansı vasitəylə ünsiyyət də qura bilməz.