FİFA Rubiales ilə bağlı yekun qərarını verdi
Luis Rubiales ilə bağlı növbəti qərar çıxarılıb.
"Football-plus.az" xəbər verir ki, İspaniya məhkəməsindən sonra FİFA da onun aqibətini müəyyən edib.
İspaniya Futbol Federasiyasının (İFF) sabiq prezidenti üç il müddətinə futbolla bağlı bütün fəaliyyətlərdən uzaqlaşdırılıb. FİFA-nın Nizam-İntizam Komitəsi Rubialesin qadınlardan ibarət İspaniya yığmasının oyunçusu Cennifer Ermosoya qarşı hərəkətinə görə belə qərar qəbul edib. Xatırladaq ki, funksioner İspaniya yığması DÇ-2023-ün avqustun 20-də keçirilən finalında İngiltərəni məğlub etdiyi oyundan sonra mükafatlandırma mərasimində Cenniferin dodaqlarından öpmüşdü. Bunun qeyri-ixtiyari, çempionluğa görə böyük sevincdən doğan hərəkət olduğunu deyən İFF-nin sabiq rəhbəri hərəkətində pis niyyət görmədiyini bildirmişdi. Amma ölkə futbol və idman ictimaiyyətinin kəskin narazılığı və etirazları ilə üzləşən Rubiales güclü təzyiqə tab gətirməyib sentyabrın 10-da istefa vermişdi.
FİFA avqustun 26-da onu İFF-nin prezidenti postundan müvəqqəti kənarlaşdırmışdı. Ali futbol təşkilatının onunla bağlı yaydığı son məlumatda belə deyilir:
“FİFA-nın Nizam-İntizam Komitəsi İspaniya Futbol Federasiyasının sabiq prezidenti Luis Rubialesin futbolla bağlı milli və beynəlxalq səviyyədə hər cür fəaliyyətinə üç il müddətinə qadağa tətbiq edib. Bu qərar o, FİFA-nın İntizam Məcəlləsinin 13-cü maddəsini pozduğu üçün verilib”.
