''Beşiktaş'' rəhbərliyi Şenol Günəşin tələbi ilə əcnəbi yarımmüdafiəçi transferi üçün qollarını çırmalayıb.

"Football-plus.az" xəbər verir ki, müxtəlif səbəblər üzündən Anderson Talişka, Roberto Pereyra, Ruslan Malinovski kimi oyunçularla anlaşa bilməyən İstanbul nəhəngi diqqətini ''Ayaks'' və Niderland yığmasının təcrübəli üzvü Devi Klaassenə yönəldib. 30 yaşlı futbolçu bu mövsüm gözlənilmədən ''Ayaks''ın start həyətindəki yerini itirib.

Klaassen bu durumdan narazıdı. O, daimi oyun praktikası əldə edəcəyi kluba yollanmaq istəyir və bunun üçün ''Ayaks'' ilə gələn il bitəcək müqaviləsini qarşılıqlı şəkildə ləğv etməyə çalışır. Tərəflərin qısa müddətdə yollarını ayıracağı gözlənilir. Türkiyə mətbuatının yazdığına inansaq, ''Beşiktaş''ın diqqət mərkəzində olduğunu öyrəndikdən sonra Klaassen Cenk Tosunla əlaqə saxlayaraq ondan klub haqda ətraflı məlumat öyrənib. Bu iki futbolçu bir neçə il öncə ''Everton''da birlikdə çıxış ediblər. ''Beşiktaş'' ''Ayaks''a təzminat ödəmək istəmir və Klaassenə illik 2,8 milyon avro maaş ödəməyə hazırdı. Yəni tanınmış futbolçu ''Ayaks''dan ayrılıb azad agent statusuna keçsə, böyük ehtimalla bu transfer dönəminin sonuna qədər ''Beşiktaş''ın oyunçusuna çevriləcək.

ƏLİ