''Fənərbaxça'' növbəti mühüm transferini açıqlamaq üzrədi.

"Football-plus.az" xəbər verir ki, bilindiyi kimi srağagün tanınmış serbiyalı futbolçu Duşan Tadiç uzun illərdi şərəfini qoruduğu ''Ayaks''la müqaviləni qarşılıqlı şəkildə ləğv edərək azad agent statusu almışdı. Niderland mətbuatının yazdığına inansaq, Tadiçə 6-sı Səudiyyə Ərəbistanından olmaqla ümumilikdə 30-a yaxın klubdan təklif gəlmişdi. Bu klublar arasında ''Qalatasaray'' ilə ''Beşiktaş'' da var idi. Xüsusilə ''Qartal'' 34 yaşlı futbolçuya uzun müddətdi, ciddi maraq göstərirdi. Amma ''Fənər'' həm prinsipial rəqiblərini, həm də digər klubları qabaqlamağı bacardı. Tadiç dünən xüsusi təyyarə ilə İstanbula gəldi. Bu gün tibbi müayinədən keçdikdən sonra tanınmış futbolçunun transferinin gün ərzində açıqlanacağı gözlənilir.

Xatırladaq ki, daha öncə ''Voyvodina'', ''Qroningen'', ''Tvente'' və ''Sauthempton''da top qovan Tadiç 2018-dən etibarən ''Ayaks''da idi. Amsterdam nəhəngi ilə bir çox uğurlar qazanan və kapitan sarğısını daşıyan Tadiç bu klubda 5 mövsüm ərzində 241 rəsmi oyunda 105 qol, 112 məhsuldar ötürməlik mükəmməl performans sərgilədi.

ƏLİ