Argentina Liqa Kubokunun (LK) qrup mərhələsi başa çatmaq üzrədi.

"Football-plus.az" xəbər verir ki, martın 15-21-i aralığında - 7 gün ərzində 11-ci turun oyunları keçirildi. Qeydə alınan nəticələrdən sonra A qrupunda beşhakimiyyətlilik 3 komandanın şərikli liderliyinə dəyişdı. B qrupunda isə “Qodoy Krus” liderliyini davam etdirdi.

10-cu turdan sonra A qrupunda birdən-birə 5 komandanın şərikli liderliyi formalaşmışdı. Topların daha yaxşı fərqinə əsasən 1-ci yerdə olan “River Pleyt” evdə “Ximnasiya”dan maksimum xal aldı. Hərçənd hesabı 11-ci dəqiqədə qonaqlar açdılar. Amma Martin Demiçelisin komandası qalan vaxtda üç cavabsız qol vurmaqla əzmkar qələbə qazandı. Ölkə nəhəngi bu nəticə ilə yenə topların daha yaxşı fərqinə əsasən 1-ci yerdəki mövqeyini qorudu.
Tura 2-ci yerdə başlayan “Talyeres de Kordoba” qələbə seriyasını 3-ə çatdıra bilmədi. Kordobalılar “Banfild” ilə səfər oyununda qolsuz heç-heçəyə razılaşdılar. İki xal itkisi onları 4-cü yerə saldı. “Arxentinos Xuniors” isə turu maksimum xalla başa vurdu. “Yeniyetmələr” evdə “Rosario Sentral”a 3:0 hesabıyla qalib gəldilər. İnamlı qələbə Pablo Gedenin komandasını 2-ci yerə çıxardı.

Bir ara vahid lider olan “İndependyente” son həftələr azarkeşlərini məyus etməkdədi. Karlos Tevesin çalışdırdığı komanda ardıcıl iki heç-heçədən sonra hesabına xal yaza bilmədi. LK-nın debütantı “Deportivo Riestra”ya minimalhesablı məğlubiyyət “İndependyente”ni şərikli liderlikdən etdi. Son 3 oyuna 2 xal qazanan “qırmızılar” 6-cı yerə düşdülər. Onlardan fərqli “Veles Sarsfild” bu dəfə də büdrəmədi. “İnstituto” üzərində qazanılan 1:0 hesablı qələbə paytaxt komandasını 5-ci yerdən 3-ə yüksəltdi. Beləliklə, A qrupunda sona 3 tur qalmış 21 xal toplayan “River Pleyt”, “Arxentinos Xuniors” və “Veles Sarsfild”in şərikli liderliyi formalaşdı. “Talyeres de Kordoba” və “Barrakas Sentral” isə hərəyə 19 xalla 4-5-ci yerləri bölüşürlər. Bu mövsümü qeyri-sabit keçirən “Rosario Sentral”ın işi getdikcə çətinləşir. Hazırda 14 xalla 8-ci yerdə olan LK-nın son çempionu pley-offa vəsiqə verən ilk “4-lüy”ə düşməyə bilər. Qrup mərhələsinin sonuna isə 3 tur qalıb.

B qrupunda “Qodoy Krus”un liderliyi davam edir. Daniel Oldranın komandası hesabat turunda autsayder “Tiqre”ni evdə minimal hesabla üstələdi. Bu nəticə mendosalılara mövqeyini qorumaq imkanı yaratdı. Onlar liderliyini bir qədər möhkəmləndirə bilərdilər. Lakin 9-cu turdan təxirə salınan səfər oyununda “San Lorenso”ya uduzdular – 0:1.

“Lanus” səfərdə “Belqrano”dan maksimum xal aldı. Minimalhesablı qələbə komanda ilə lider arasındakı bir xallıq fərqi qorudu. Qrupda 1-ci yer uğrunda mübarizə böyük ehtimalla “Qodoy Krus”la “Lanus” arasında gedəcək.

Tura 3-cü yerdə başlayan “Estudiantes”in “Boka Xuniors”la ev oyununda arzuolunmaz hadisə baş verdi. Hakim La Platada keçirilən matçı 27-ci dəqiqədə dayandırmalı oldu. Meydan sahiblərinin oyunçusu Altamiranonun huşunu itirərək qazona yıxılması oyunun qeyri-müəyyən müddətə təxirə salınmasını qaçılmaz etdi. Yaxşı ki, 24 yaşlı çilili yarımmüdafiəçinin səhhəti ilkin yardımdan sonra aparıldığı xəstəxanada normallaşdı. Zəruri təxirəsalma “Estudiantes”in turnir cədvəlindəki mövqeyinə təsir etməsə də, “Boka Xuniors” 5-ci yerdən 7-yə gerilədi.

“Nyuellz Old Boyz” evdə “Platense”dən bir xal (0:0) almaqla 4-cü yerdə qaldı. Turu bir xalla başa vuran “Defensa y Xustisiya” isə 6-cı yerdən 5-ə yüksəldi.

qrup mərhələsi, 11-ci tur
River Pleyt - Ximnasiya 3:1
Eçeverri, 29. L.Qonsales, 70. Kolidio, 86 – B.Dominges, 11.
Banfild - Talyeres de Kordoba 0:0
Arxentinos Xuniors - Rosario Sentral 3:0
M.Romero, 21; 51. Qondou, 41-p.
Deportivo Riestra - İndependyente 1:0
P.Ramires, 17.
Veles Sarsfild – İnstituto 1:0
Elias Qomes, 81.
Qodoy Krus - Tiqre 1:0
Badaloni, 25.
Belqrano - Lanus 0:1
Bou, 77.
Nyuellz Old Boyz – Platense 0:0
San Lorenso - Sarmyento 1:0
K.Ferreyra, 6.
Rasinq - Defensa y Xustisiya 1:1
Kintero, 87 - Ramos, 62.
Atletiko Tukuman - İndependyente Rivadaviya 2:2
Akosta, 18. Tesuri, 33 – Abesasis, 71. Sartori, 82.
Barrakas Sentral - Atletiko Urakan 1:0
A.Dominges, 11.
Union - Sentral Kordoba 2:2
Orsini, 21. Luna Diale, 41 – Monson, 16. Vicanoni, 90+7.
“Estudiantes” – “Boka Xuniors” oyunu 27-ci dəqiqədə dayandırılıb.

9-cu turdan təxirə salınan oyun
San Lorenso – Qodoy Krus 1:0
Tarraqona, 67.

A qrupu
1. River Pleyt 11 5 6 0 21-7 21
2. Arxentinos Xuniors 11 6 3 2 20-10 21
3. Veles Sarsfild 11 6 3 2 13-12 21
4. Talyeres de Kordoba 11 5 4 2 20-13 19
5. Barrakas Sentral 11 5 4 2 12-9 19
6. İndependyente 11 5 3 3 10-7 18
7. İnstituto 11 5 2 4 14-9 17
8. Rosario Sentral 11 4 2 5 7-13 14
9. Ximnasiya 11 4 1 6 13-17 13
10. Banfild 11 2 5 4 10-12 11
11. Deportivo Riestra 11 3 2 6 6-13 11
12. Atletiko Urakan 11 2 3 6 7-12 9
13. İndependyente Rivadaviya 11 2 1 8 11-21 7
14. Atletiko Tukuman 11 0 6 5 4-16 6

B qrupu
1. Qodoy Krus 11 7 2 2 13-4 23
2. Lanus 11 7 1 3 17-8 22
3. Estudiantes 10 5 3 2 11-7 18
4. Nyuellz Old Boyz 11 5 3 3 11-11 18
5. Defensa y Xustisiya 11 4 5 2 13-13 17
6. Boka Xuniors 10 4 4 2 14-9 16
7. Union 11 4 4 3 12-10 16
8. Rasinq 11 4 3 4 15-10 15
9. San Lorenso 11 3 6 2 9-10 15
10. Platense 11 2 6 3 5-11 12
11. Sentral Kordoba 11 2 4 5 9-12 10
12. Sarmyento 11 2 3 6 9-16 9
13. Belqrano 11 1 5 5 13-15 8
14. Tiqre 11 1 2 8 5-17 5
Bombardirlər: Borxa (River Pleyt) - 10, A.Martines (Rasinq), İ.Ramires (Nyuellz Old Boyz) - 7.