Türkiyə Futbol Federasiyası Türkiyə superkubokunun tarixi ilə bağlı yekun qərarını açıqlayıb.

Xatırladaq ki, ''Qalatasaray'' ilə ''Fənərbaxça''nın üz-üzə gələcəyi başıbəlalı superkubok matçı hələ dekabrın 29-da Səudiyyə Ərəbistanında keçirilməli idi.

O vaxt məlum səbəblər üzündən təxirə salınan oyun TFF-nin qərarı ilə aprelin 7-də Şanlıurfada baş tutmalıdı. Amma Türkiyənin avrokuboklardakı yeganə təmsilçisi ''Fənərbaxça'' aprelin 11-də Konfrans Liqasının 1/4 finalının ilk oyununda səfərdə ''Olimpiakos''la qarşılaşacaq. ''Fənər'' əmsallar cədvəli baxımından Türkiyə futbolu üçün önəm kəsb edən həmin matça daha yaxşı hazırlaşmaq istəyirdi. Bu üzdə klub rəhbərliyi superkubokun başqa bir tarixə keçirilməsi üçün federasiyaya rəsmən müraciət etmişdi. Amma federasiyanın bu gün açıqladığı qərarda belə məlum oldu ki, ''sarı-lacivərdlilər''in tələbi rədd edilib. Çünki TFF derbinin daha öncə açıqlandığı kimi aprelin 7-də Şanlıurfada oynanılacağını təsdiq edib.

Şayiələrə inansaq, oyunun tarixinin dəyişməsini qarşı tərəf, yəni ''Qalatasaray'' istəməyib. ''Cim-Bom'' razılıq versəydi, federasiya yenə superkubokun vaxtını dəyişəcəkdi.

ƏLİ