Türkiyə çempionatında bu mövsüm nəfəsləri kəsən çempionluq mübarizəsi davam edir.

"Football-plus.az" xəbər verir ki, “Qalatasaray”la “Fənərbaxça”nın az qala hər tur qalib gəlməsi tez-tez müxtəlif rekordların qırılması ilə nəticələnir. Hər iki əzəli rəqib hər tur xal hesabında rekord qırır. 29-cu turu “Qalatasaray” 78, “Fənərbaxça” 76 xalla tamamlayib ki, bu da superliqa tarixi üçün tam yeni göstəricilərdi. Yeri gəlmişkən, ilk iki pillədə qərarlaşan klubun 29-cu turdan sonra hesabında ümumilikdə 154 xal olması da cari mövsümün çox qeyri-adi bir mübarizəyə səhnə olmasının göstəricisidi. Son 20 ildə Avropanın öndə gələn 8 çempionatına nəzər salsaq, görərik ki, onların heç birində 29 turdan sonra ilk iki pillədə qərarlaşanların hesabında ümumilikdə bu qədər xal olmayıb! Bu göstəricidə 2-ci pillədə 2021/22-də Portuqaliya çempionatındakı rəqabət yer alır. Həmin dönəmdə “Portu” (79) ilə “Sportinq”in (73) 29-cu turdan sonra hesabında ümumilikdə 152 xal var idi. 3-cü pillədə isə Avropa futbolunun ən böyük rəqabətlərindən biri yer alır. Belə ki, 2010/11-də La Liqada 29-cu turdan sonra “Barselona” (78) və “Real” (73) ümumilikdə 151 xal toplamışdı. Superliqada sona 9 tur qalıb və bir çoxlarının fikrincə, çempionluğun taleyi sondan əvvəlki turda “Qalatasaray”la “Fənərbaxça” arasında “Rams Park”da keçiriləcək derbidə həll olunacaq. Əzəli rəqiblər bu performansı və bu orta xal hesabını davam etdirsələr, onların hər ikisi bu mövsüm 100 xal həddini aşa bilər! Maraq üçün bildirək ki, 3 xallıq sistemdə həm xal, həm də qol rekordu “Fənərbaxça”ya aiddi. “Sarı-lacivərdlilər” 1988/89 mövsümünü 93 xal və 103 qol göstəriciləri ilə tamamlamışdılar.

Bu arada başıbəlalı Türkiyə superkuboku ilə bağlı yeni xəbər var. Bu matçın heç cür “bəxti açılmır”. Bilindiyi kimi, əzəli rəqiblər arasında keçirilməli olan superkubok hələ dekabrın 29-da Səudiyyə Ərəbistanında sahibini tapmalı idi. Məlum səbəblər üzündən baş tutmayan həmin görüş Türkiyə Futbol Federasiyasının qərarı ilə aprelin 7-də Şanlıurfada keçirilməlidi. Amma ortaya yenə problem çıxıb. Dünən “Fənərbaxça” başqanı Əli Koç 2 saatdan artıq davam edən mətbuat konfransında bu məsələyə toxunub. O, “Qalatasaray”ın razılıq verəcəyi təqdirdə fdederasiyaya yenidən bu oyunun təxirə salınması üçün müraciət edəcəklərini bildirib. Məsələ burasındadı ki, “Fənər”in “Yunion” səddini adlayaraq Konfrans Liqasında 1/4 finala yüksəlmək ehtimalı böyükdü. Bu turnirdə 1/4 finalın ilk oyunu aprelin 11-də, yəni superkubokdan 4 gün sonra keçiriləcək. “Fənərbaxça” yarımfinala yüksələcəyi təqdirdə Türkiyə əmsallar cədvəlində mövsümü ilk “10-luq”da, dəqiq desək, 9-cu pillədə bitirməyi praktiki cəhətdən rəsmiləşdirəcək. Bu üzdən Əli Koç komandasının 1/4 finala yaxşı hazırlaşması üçün yenidən superkubokun vaxtının dəyişdirilməsi tələbi ilə federasiyaya müraciət edəcəklərini istisna etməyib.