''Fənərbaxça'' ilə ''Qalatasaray'' arasında dekabrın 29-da oynanılması planlaşdırılan, amma məlum səbəblər üzündən təxirə salınan Türkiyə superkuboku ilə bağlı yeni xəbər var.

"Football-plus.az" xəbər verir ki, bir müddət öncə Türkiyə Futbol Federasiyası və iki nəhəng arasında görüşün ötən il baş vermiş dəhşətli zəlzələ zonasında oynanılması ilə bağlı razılıq əldə olunması haqda şaiyələr peyda olmuşdu. Belə görünür, bu, şaiyə yox, həqiqətdi. Dünən ''Şanlıurfaspor''un başqan köməkçisi və mətbuat katibi Mustafa Çadırcı sürpriz bir paylaşım edərək bunları yazdı: ''Superkubok matçı Şanlıurfaya xeyirli olsun. Bu qərarın qəbul edilməsində azacıq da olsa, əməyim varsa, bu, məni çox sevindirir. Superkubok qarşılaşması zəlzələnin qurbanı olan, sel fəlakəti yaşayan, iqtisadiyyatı alt-üst olan bölgəmizin tanınması, eləcə də turizmin inkişafı baxımından əvəzsiz bir olaydı''. Bununla bağlı TFF tərəfindən rəsmi açıqlamanın verilməməsinin səbəbi isə odu ki, oyunun tarixi hələ də dəqiqləşməyib. Federasiya derbini aprelin 28-nə salmaq istəyir. Amma bu tarix ''Fənər''i qane etmir. ''Sarı-lacivərdlilər'' superliqada ''Beşiktaş''a qarşı derbidən dərhal sonra ''Qalatasaray''a qarşı oynamaq istəmirlər. Matçın aprelin 3-nə salınması ehtimalı da var. Qeyd edək ki, 2010-cu ilin mayında istifadəyə verilən 28965 azarkeş tutumuna malik olan ''Şanlıurfa GAP Stadionu'' artıq bir dəfə finala ev sahibliyi edib. 2010-cu ildə ''Trabzonspor'' məhz bu stadionda ''Fənərbaxça''nı 3:1 məğlub edərək Türkiyə kubokunun qalibi olmuşdu.

ƏLİ