“Qarabağ”ın “Olimpiya”ya qarşı keçirəcəyi Avropa Liqasının pley-off mərhələsinin ilk oyunu Bolqarıstandan olan hakimlər briqadasına tapşırılıb. FİFA referisi Georgi Kabakova Martin Marqaritov və Diyan Valkov laysmanlar qismində yardımçı olacaqlar. Radoslav Gicenov isə dördüncü hakim funksiyasını yerinə yetirəcək.

"Football-plus.az"ın ənənəvi hakim təqdimatına keçid alaq.

Georgi Kabakov... 37 yaşlı ədalət təmsilçisi karyerasına 2001-ci ildə başlayıb. 6 il Bolqarıstanın aşağı liqa matçlarını idarə etdikdən sonra elita qarşılaşmalarında meydana çıxıb. Ölkə çempionatlarında 100-ə yaxın görüşdə iş başında olan Kabakov 2013-cü ildə FİFA referisi olub. Karyerası çox zəngindi. O, Bolqarıstanda keçirilən turnirlərdə ümumilikdə 274 matç idarə edib. Referi bu qarşılaşmalarda 1585 sarı, 92 qırmızı vərəqə göstərib. Ölkəsində sevildiyini iddia etmək doğru olmaz. Baş məşqçilər tez-tez hakimin qərarlarını sərt tənqid edir. Görünən odu ki, başverənlər onun beynəlxalq matçlarda iştirakına ciddi təsir göstərmir. Hər halda, UEFA ona xeyli əhəmiyyətli matçda güvənib. Kabakov Çempionlar, Avropa, Konfrans, Millətlər, Gənclər Liqası oyunlarını, beynəlxalq yoldaşlıq görüşlərini (11), U-17, U-19 və U-21 komandaları arasında Avropa çempionatı qarşılaşmalarını idarə edib.
Kabakovla yollarımız ikinci dəfə kəsişir. Belə ki, hakim AÇ-2020-in seçmə mərhələsinin Xorvatiya – Azərbaycan qarşılaşmasını idarə edib. “Fit sahibi” oyunboyu 1 sarı vərəqə göstərib ki, bu da bizimkilərdən Maksim Medvedevin payına düşüb. Zaqrebdəki “Maksimir” stadionunda keçirilən oyun millimizin 1:2 hesablı məğlubiyyəti ilə başa çatıb.

Ümumiyyətlə, ədalət təmsilçisi karyerası ərzində 376 matça çıxıb. Bu qarşılaşmalarda 2102 sarı, 122 qırmızı vərəqə göstərib.

KƏNAN BAHADIR