İsveçdə yerli “Həkken”lə “Qarabağ” arasında keçiriləcək Avropa Liqasının qrup mərhələsinin 2-ci turunun oyununa təyinatları bəllidi.

Qarşılaşma Avstriyadan olan hakimlər briqadasına tapşırılıb. FİFA referisi Sebastyan Qishamerə Roland Ridl və Santino Şreyner laynsman qismində yardımçı olacaq. Dördüncü hakim funksiyasını Stefan Ebner yerinə yetirəcək. Qəzetimizin ənənəvi hakim təqdimatına keçid alaq.

Sebastyan Qishamer... 34 yaşlı referinin karyerasından bəhs etmək çox vaxtımızı almayacaq. Çünki hakim zəngin təcrübəyə malik deyil. Avstriyalı “fit sahibi” daha çox ölkəsinin 2-ci liqa matçlarında işləyib. Tədricən yerli federasiyanın güvənini qazanan ədalət təmsilçisi bir neçə il sonra bundesliqa oyunlarında görünüb. O, aşağı dəstədə 95, elitada 81, ölkə kuboklarında 30 qarşılaşma idarə edib. Sebastyan bu matçlarda ümumilikdə 779 sarı, 56 qırmızı vərəqə göstərib. Hakimin sözügedən oyunlarda qaneedici çıxış etmədiyi bəllidi. Maraqlıdı ki, referi yerli çempionatda belə az-az yada düşür. Hətta, sadəcə, məcburiyyət yarandıqda təyinat aldığını desək, yanılmarıq.

Qishamer 2018-ci ildə UEFA-nın diqqətini çəkib. Həmin vaxtdan bəri beynəlxalq oyunlara təyinat alır. O, bu günə qədər Çempionlar, Konfrans və Avropa Liqalarının təsnifat mərhələləri, beynəlxalq yoldaşlıq oyunları, Gənclər Liqası, 17, 19, 21 yaşadək futbolçular arasında Avropa çempionatının seçmə mərhələləri və Millətlər Liqasının matçlarını idarə edib. Maraqlıdı ki, Sebastyan məhz bu gün Avropa Liqasının qrupunda ilk dəfə oyun idarə edəcək. Bununla yanaşı, hakim məhz ötən mövsümdən avrokubokların qrup mərhələsində ədaləti qoruyur. Qeyd edək ki, o, indiyə qədər nə millimizin, nə də klublarımızın oyunlarına təyinat alıb.

Ümumiyyətlə, Qishamer karyerası ərzində 290 matçda iş başında olub, bu görüşlərdə 1297 sarı, 79 qırmızı vərəqə göstərib.

KƏNAN BAHADIR