“Beşiktaş”da müqavilə müddəti mövsümün sonunda başa çatacaq futbolçularla hələ də razılıq əldə olunmayıb.

"Football-plus.az" xəbər verir ki, belə oyunçuların başında Cenk Tosunla Salih Uçan gəlir. Tosunla hələ əvvəlki rəhbərliyin, yəni Ahmet Nur Çəbinin dönəmində aparılan danışıqlar uğursuz alınmışdı. Belə görünür, Hasan Aratın dönəmində də bu baxımdan bir yenilik yoxdu. Rəhbərliklə təcrübəli futbolçu heç cür anlaşa bilmir. Türkiyə mətbuatının yazdığına inansaq, İstanbul nəhənginin baş əlaqələndiricisi Samet Aybaba ilə Cenk Tosun yeni müqavilənin şərtlərini razılaşdırmaq üçün srağagün bir araya gəlib. 32 yaşlı hücumçu əvvəlki görüşlərdə olduğu kimi, yenə rəhbərlikdən illik 1,5 milyon avro məvacib olmaqla ikiillik müqavilə tələb edin. Aybaba futbolçunun şərtlərini idarə heyətinə çatdırıb. Amma bu şərtlər qəbul olunmayıb. “Beşiktaş” yavaş-yavaş önümüzdəki dönəmlərdə yerli futbolçulara məvacibi avro ilə yox, yerli pulla, yəni lirə ilə vermək niyyətindədi. Ancaq Cenk bu şərti qəbul etmir. Üstəlik idarə heyəti onun tələbinin yüksək olduğunu düşünsə də, tanınmış futbolçu 1,5 milyon avrodan bir qəpik də aşağı düşmək niyyətində deyil. Şayiələrə inansaq, rəhbərliyin onunla bağlı mövqeyi futbolçunu qəzəbləndirdiyi üçün Tosun “mövsümün sonunda görüşərik” deyərək danışıqlar masasından ayrılıb. Qeyd edək ki, Türkiyə yığmasının üzvü “Beşiktaş”dakı 3-cü fərqli dönəmini keçirir. O, daha öncə 2014-18-ci illərdə, eləcə də 2020/21 mövsümünün 2-ci dövrəsində “ağ-qaralar”ın şərəfini qoruyub. Statistikaya nəzər salsaq, görərik ki, Tosun “Beşiktaş”da ən pis 2-ci mövsümünü keçirir. Bu mövsüm superliqada onun hesabında 25 oyunda yalnız 5 qol, 4 məhsuldar ötürmə var. Bu da o deməkdi ki, Tosun hər oyunda orta hesabla 0,3 qolun vurulmasında iştirak edir. Yalnız onun ilk mövsümündə, yəni 2014/15-də bu göstərici indikindən daha zəif (0,2) olub. Həmin vaxt Cenk superliqada 18 oyuna 5 qol vurmuşdu.