Ümidləri doğrultmayan Mişi Batşuayini ''Çelsi''yə göndərən ''Beşiktaş''da hücumçu axtarışları davam edir.

''Bernli''nin niderlandlı forvardı Vut Veqhorstla danışıqlar davam etsə də, hələ ki, maddi məsələlərdə anlaşma əldə olunmayıb. Bu arada rəhbərlik alternativ variantlar arasında olan Cenk Tosunla Burak Yılmaz arasında seçim etməkdə çətinlik çəkir. Daha öncə iki fərqli dönəmdə ''Qartal''ın şərəfini qorumuş hər iki təcrübəli forvard hazırda azad agent statusundadı. Bir tərəfdən 30 yaşlı Tosun 36 yaşlı Burakla müqayisədə daha faydalı görünə bilər. Amma digər tərəfdən Cenk son illərdə zədəyəmeyilli futbolçuya çevrilib və onun normal oyun praktikası da yoxdu. Məsələn, son 3 mövsümə nəzərə salsaq, Tosun iki dəfə ağır şəkildə zədələnib və ümumilikdə 508 gün oynamaq iqtidarında olmayıb. Burak isə eyni müddət ərzində zədə üzündən cəmi 54 gün kənarda qalıb. Digər tərəfdən Yılmaz ''Beşiktaş''a qayıdaraq bir il oynadıqdan sonra karyerasını bu klubda tamamlamaq və ardından akademiyada baş məşqçi fəaliyyətinə başlamaq niyyətindədi. Həm də ''Beşiktaş''ın rəsmi üzvü olan Yılmaz Tosundan fərqli olaraq ''ağ-qaralar''dan elə də böyük məbləğ tələb etmir. Bu məsələdə yekun qərarı baş məşqçi Valerien İsmael verəcək.