Bu mövsüm çempionluq yarışından tez çəkilən “Beşiktaş”da Cenk Tosunla bağlı problem yaşanır.

"Football-plus.az" xəbər verir ki, İstanbul nəhəngində 3-cü dönəmini keçirən təcrübəli forvarda bir müddət öncə ABŞ-dan olduqca sərfəli təklif gəlmişdi. MLS təmsilçisi “Çikaqo Fayr” ona ilə 2 milyon dollar maaş olmaqla 3 illik müqavilə təklif etmişdi. Amerikalılar “Beşiktaş”ın özünə də 2 milyon dollarlıq təklif irəli sürmüşdü. Rəhbərlik təcrübəli futbolçuya güvəndiyi üçün onu buraxmaq istəmədi. Amma amerikalıların təklifi hələ də qüvvədədi. Cenkin Okeanın o tayına yollanmaq üçün ən azı iki səbəbi var. “Beşiktaş”da illik məvacibi cəmi 550 min avro olduğu halda, ABŞ-da 3 ilə ən azı 6 milyon dollar qazana bilər! Bundan başqa, Türkiyə mətbuatının yazdığına inansaq, futbolçunun həyat yoldaşı Ece də ABŞ-da yaşamaq perspektivini bəyənir. Buna görə də Cenkin belə desək, beyni qarışıb. Onun son matçlarda zəif təsir bağışlamasını bu məsələ ilə əlaqələndirənlər çoxdu. İndi “Beşiktaş” rəhbərliyinin yayda Cenkə irəli sürəcəyi yeni təklifdən çox şey asılı olacaq. 31 yaşlı oyunçu ötən yay “Everton”dan ayrılandan sonra “Beşiktaş”la “1+1” illik müqavilə imzaladı. Cenk bu mövsüm 25 rəsmi oyunda 12 qol, 2 məhsuldar ötürməlik performans sərgiləyib. O, daha 3 qolda yaxından iştirak edəcəyi təqdirdə şərti müqavilə avtomatik qüvvəyə minəcək. Amma təbii ki, Cenk məvacibinin artırılmasını istəyir. Çünki müqayisə üçün Abubakarın (3,1 milyon avro) ondan 6 dəfə, ümidləri doğrultmayan Dele Allinin (2,2) 4 dəfə, satılmaq üzrə olan N`Kudunun (1,6) 3 dəfə çox qazandığını bildirək. Şayiələrə inansaq, rəhbərlik yayda Cenkə 1-1,5 milyon avro məvaciblə ikiillik yeni müqavilə təklif edəcək.