Daha əvvəl azarkeşlərdən əldə etdiyimiz məlumata görə, klub rəhbərliyi onlara köç prosesinin noyabrın sonuna qədər başa çatacağını vəd etmişdi. Daha sonra “dənizçilər”in rəsmi sosial şəbəkə hesablarında Qubaya köçlə bağlı işlərin davam etdiyi, yalnız sənədləşmə məsələlərinin həllini gözlədiyi qeyd olunmuşdu. Ancaq noyabrın ortası olmasına baxmayaraq, komanda hələ də Qubaya köçməyib.
Bəs proses niyə ləngidi? Köçə mane olan əsas səbəb nədi? Komanda nə vaxt Qubaya köçərək bölgəni təmsil etməyə başlayacaq?
“Football-plus.az” bu suallara aydınlıq gətirmək üçün “Səbail”in prezidenti Mirzə Bayrampurun müşaviri Emin Abbasovla əlaqə saxlayıb:

"Klubun addəyişmə prosesi gedir. Belə ehtimal edirəm ki, Qubaya köçənə qədər bu məsələ də tam həll olunar. Qubaya köç etməyə gəlincə, ilk növbədə ot örtüyünü dəyişmək lazımdı ki, komanda həm məşqlərini, həm də oyunlarını Quba Olimpiya Kompleksində keçirə bilsin. Bunun üçün Almaniya şirkətinin niderlandlı əməkdaşı artıq ölkəmizə gəlib. Sabah səhər Qubada olacaq, drenaj xəttlərinin vəziyyəti və s. ilə bağlı araşdırma aparacaq. Qərar veriləndən sonra örtüyün dəyişdirilməsi ilə bağlı müddət deyiləcək. Mən belə başa düşürəm ki, gələn ilin aprelinə qədər bütün məsələlər həllini tapar".
İSRAYIL XEYRULLAYEV





